एजेन्सी – फ्रेन्च क्लब पेरिस सेन्ट जर्मेन (पिएसजी) र फ्रान्स राष्ट्रिय टोलीका स्टार फरवार्ड किलियन एमबाप्पे स्पेनिस क्लब रियल म्याड्रिड जाने पक्का भएको छ । स्पेनी संचारमाध्यमका अनुसार रियलले एमबाप्पेसँग आउँदो जुलाई देखि २०२९ सम्मको सम्झौता गरेको छ ।

पिएसजीले बिहीबार एउटा विज्ञप्ति निकाली एमबाप्पेले यो सिजन पश्चात क्लब छोड्ने घोषणा गरेको थियो । फ्रेन्च सञ्चार माध्यमका अनुसार त्यसअघि एमबाप्पेले आफ्नो क्लब र सहकर्मीहरुलाई यो सिजनपछि क्लब संग आफ्नो सम्झाैता नवीकरण नगर्ने जानकारी दिएका थिए ।

एमबाप्पेलाई रियलले उनी अर्को फ्रेन्च क्लब मोनाकोमा हुँदादेखि क्लबमा भित्र्याउन चाहना राख्दथ्यो । तर उनी सन् २०१८ मा मोनाकोबाट १८० मिलियन यूरो ट्रान्सफर फि सहित पिएसजीमा अनुबन्ध भएका थिए । त्यसबेला उनी मात्र १८ वर्षका थिए ।

त्यसपछि रियलले लगभग हरेक वर्षमा एमबाप्पे भित्र्याउन चाहेको स्पेनी सञ्चार माध्यमले सार्वजनिक गर्ने गरेका थिए । २०२२ मा उनको पिएसजी सँगको सम्झौता सकिएको बेला उनी रियल जाने सम्भावना धेरै भएको आँकलन गरिएको थियो । तर उनी पिएसजीको प्रस्ताव स्वीकार्दै फ्रान्समै बसेका थिए ।

तर यसपटक भने उनको रियल जाने विषयले गति लिएको छ । स्पेनी सञ्चार माध्यमका अनुसार रियलले २०२२ मा गरेको प्रस्तावभन्दा अहिलेको प्रस्ताव आर्थिक रूपमा धेरै कम रहेको छ । तर त्यसका बाबजुद उनले रियलको प्रस्ताव स्वीकारेका छन् ।

एमबाप्पेले आफ्नो करियरमा ४ सय २६ खेल खेल्दै ३ सय १७ गोल गरेका छन् । फ्रेन्च शीर्ष डिभिजन लिग १ मा उनी १ सय ८५ गोल गर्दै सर्वाधिक गोलकर्ताको सूचीमा नवौं स्थानमा छन् । उनले लगातार ५ सिजन लिगको शीर्ष गोलकर्ताको उपाधि समेत पाएका छन् ।

उनी २४ वर्षमै पिएसजीको इतिहासमा २ सय ४४ गोलसहित सर्वाधिक गोलकर्ता समेत हुन् । युरोपेली च्याम्पियन्स लिगमा उनी २४ वर्षको उमेरमा नै ४४ गोल गरिसकेका छन् ।

उनले फ्रेन्च राष्ट्रिय टोलीका लागि ७३ खेलमा ४६ गोल गरेका छन् र सर्वाधिक गोलकर्ताको सूचीमा ओलिभियर जिरुड (५६) र थियरी हेनरी (५१) भन्दा मात्र पछि रहेका छन् । २०१८ मा फ्रान्सले विश्वकप उचाल्दा उनले महत्वपूर्ण भूमिका खेलेका थिए । २०२२ को विश्वकपमा फाइनलमा पराजित भएतापनि फाइनलमा ह्याट्रिक सहित ८ गोल गर्दै एमबाप्लेपेले गोल्डेन बुट जितेका थिए ।