दिपक बोहोरा, पाँचथर

झापा ११ फुटबल क्लब चौथो पाँचथर गोल्डकप प्रतियोगिताको सेमिफाइनलमा पुगेको छ । रेडहर्स फुटबल क्लब इलामलाई आइतबार १–० ले हराउँदै झापा ११ अन्तिम चारमा पुगेको हो ।

स्थानिय खेलाडी लिएर उत्रेको झापाले ३ विदेशी खेलाडी सम्मलित रेडहर्सलाई हराएको थियो । प्रदीप बुढाथोकीले ६४ औं मिनेटमा गरेको गोल खेलको निर्णायक बन्यो । निकेश श्रेष्ठको फ्रिकिकमा प्रदीपले हेडमार्फत गोल गरेका थिए ।

ए डिभिजन र नेपाल सुपर लिगको अनुभवी बटुलेका खेलाडी लिएर उत्रेको रेडहर्स पहिलो खेलमै स्तब्ध बन्यो । खेलमा पछि परेपछि गोल फर्काउने अवसरलाई रेजर्सले उपयोग गर्न सकेन ।

झापाका प्रदिप बुढाथोकी म्यान अफ दि म्याच बने र ५ हजार रुपैयाँ प्राप्त गरे । झरना खवास फ्यान अफ दि म्याच भइन् । देविका गुरुङ सुटआउट हिरो ( खेलमैदानको बिचबाट गोल गर्ने दर्शक) बनिन् । दुबैले समान २ हजार ५ सय रुपैयाँ प्राप्त गरे ।

ए डिभिजन क्लब त्रिभुवन आर्मी फुटबल सहित ८ टोलीले सहभागिता रहेको प्रतियोगिताको विजेताले ट्रफीसहित ५ लाख ५ हजार, दोस्रोले दुई लाख ५५ हजार रुपैयाँ प्राप्त गर्नेछन् ।

पाँचथर गोल्डकपमा सोमबारको खेल
पथरी ११ विरुद्ध बागमती फुटबल क्लब सर्लाही
खेल समय – दिउँसो २ बजे