दिपक बोहरा, पाँचथर

आयोजक टोलीले चौथो पाँचथर गोल्डकप प्रतियोगिताको फाइनलमा पुगेको छ।

पहिलो सेमिफाइनल खेलमा बुधबार बागमती युथ क्लब सर्लाहिलाई १-० ले हराउँदै पाँचथर क्लब उपाधि नजिक पुगेको हो । रोशन आङदेम्बेको गोलमा पाँचथरले‌ अन्तिम दुईको यात्रा तय गरेको हो।

पाँचथरले फाइनलमा झापा ११ र त्रिभुवन आर्मी फुटबल क्लबबीचको विजेतासँग प्रतिस्पर्धा गर्नेछ ।

पहिलो हाफको इन्ज्युरी समयमा पाएको कर्नरलाई सदुपयोग गर्दै पाँचथरले गोल गरेको थियो । विवेक पौडेलको कर्नरमा रोशनले हेडर गोल गरेका थिए ।
खेलमा दुबै टोलीले गोलको अवसर पटक पटक गुमाएका थिए ।

खेलको १३ औं मिनेटमा पाँचथरका प्रकाश धमलाको शक्तिशाली प्रहार बारमा लागेर फर्केको थियो । ६४ औं मिनेटमा पाँचथरका आशिष चापागाईको प्रहार बारमा लागेर रिबाउन्ट भएको बललाइ शुक्रराजले गरेको प्रहार बार माथिबाट बाहिरिएको थियो ।

अवसर गुमाउँदा खेलमा पराजित भएको बागमतीका प्रशिक्षक सुजिल श्रेष्ठले बताए । खेलाडीको आपसी समन्वयमा जित हासिल गरेको पाँचथरका प्रशिक्षक मिलन जबेगुले बताए । पाँचथरका गोलरक्षक मिराक खजुम म्यान अफ दि म्याच बने र ५ हजार रुपैयाँ प्राप्त गरे ।

लाखे ग्रुप फिदिमको समुह फ्यान अफ दि म्याच भए र २ हजार ५ सय रुपैयाँ प्राप्त गरे । नबिन तुम्रोक सुटआउट हिरो ( खेलमैदानको बिचबाट गोल गर्ने दर्शकर्) बन्दै २ हजार ५ सय प्राप्त गरे ।

प्रतियोगिताको विजेताले ट्रफीसहित ५ लाख ५ हजार, दोस्रोले दुई लाख ५५ हजार रुपैयाँ प्राप्त गर्नेछन् ।

पाँचथर गोल्डकपको दोस्रो सेमिफाइनल
झापा ११ र त्रिभुवन आर्मी फुटबल
समय – दिउँसो २:०० बजे