एजेन्सी – पोर्चुगिज मिडफिल्डर बर्नाडो सिल्भा चम्कँदा प्रिमियर लिग क्लब म्यानचेस्टर सिटी एफए कपको सेमिफाइनलमा प्रवेश गरेको छ ।

प्रिमियर लिग प्रतिद्धन्द्धी न्यूक्यासल युनाइटेडलाई २–० ले पराजित गर्दै सिटीले अन्तिम चारको यात्रा तय गरेको हो । घरेलु मैदान इतिहाद स्टेडियममा शनिबार राति भएको खेलमा सिटीको जितमा दुवै गोल पोर्चुगिज मिडफिल्डर बर्नाडो सिल्भाले गरे । दुवै गोल पहिलो हाफमा भएको थियो ।

खेलको १३औं मिनेटमा सिल्भाले गोल गर्दै सिटीलाई १–० को अग्रता दिलाए । उनले रोड्रीको पासमा गोल गर्न सफल भएका थिए । त्यसपछि सिल्भाले ३१औं मिनेटमा रुवेन डियासको पासमा गोल गर्दै सिटीको अग्रता दोब्बर पारे ।

७२ प्रतिशत बल पोसेसन राख्दै पाहुना टोलीमाथि लगातार दवाव बढाएपनि सिटीले दोस्रो हाफमा भने थप गोल गर्न सकेन । न्यूक्यासलले काउन्टर अट्याकमा केही प्रयास गरेपनि सफल हुन सकेन ।

यसअघि खेलको अन्त्यतिर दुई गोल गरेर वल्भ्सलाई ३–२ ले पराजित गर्दै च्याम्पियनसिप क्लब कोभेन्ट्री सिटीले सेमिफाइनलमा स्थान बनाएको छ । कोभेन्ट्रीको जितमा इलिस सिम्सले दुई तथा हाजी राइटले एक गोल गरे ।

वल्भ्सका रायन एइट नोउरी र ह्युगो बुएनोले गोल गरे । खेलको ५३औं मिनेटमा सिम्सको गोलबाट कोभेन्ट्रीले अग्रता लिएको थियो । त्यसपछि खेलको अन्त्यतिर चार गोल हुँदा कोभेन्ट्रीले बाजी मार्न सफल भयो ।

८३औं मिनेटमा रायन र ८८औं मिनेटमा ह्युगोले गोल गर्दा खेल वल्भ्सको पक्षमा पुगेको थियो । तर, इन्ज्युरी समयको थप गरिएको समयमा ३ मिनेटको अन्तरमा कोभेन्ट्रीले दुई गोल गर्दै नाटकीय जित निकाल्यो ।

इन्ज्युरी समयको थप गरिएको सातौं मिनेटमा सिम्सले व्यक्तिगत र टोलीका लागि दोस्रो तथा १०औं मिनेटमा हाजीले गोल गरे । अर्काे क्वाटरफाइनलमा आज राति चेल्सी र लेस्टर सिटी तथा म्यानचेस्टर युनाइटेड र लिभरपुलबीच प्रतिस्पर्धा हुनेछ ।