काठमाडौं (हाम्रो खेलकुद) – राष्ट्रिय खेलकुद परिषद (राखेप) को स्वीकृति विना नै अखिल नेपाल फुटबल संघ (एन्फा) ले राष्ट्रिय पुरुष फुटबल टोलीसँग प्रत्यक्ष सरोकार नरहेका ८ पदाधिकारी बहराइन पठाएको छ ।

मलेसियामा मैत्रीपूर्ण खेलपछि फुटबल टोली सिधै बहराइन पुगिसकेको छ । टोलीसहित अन्य गरि ४१ सदस्य टोलीको सहभागिताका लागि स्वीकृति दिनका लागि एन्फाले राखेपमा बिहीबार पत्राचार गरेको थियो ।

बहराइन पुगेको फुटबल टोलीसहित डां राजु डंगोल र मिडिया अफिसर गोविन्दराज नेपाललाई मात्र राखेपले सहभागिताको लागि स्वीकृति दिएको छ । त्यसका वावजुद पनि अन्य ८ पदाधिकारी एन्फा केन्द्रीय सदस्य टिकाराम लामा हेड अफ डेलिगेट्स तथा मणिराज विष्ट, रामचन्द्र तामाङ लामा, रन्जन कार्की, राजकाजी श्रेष्ठ, महेशचन्द्र महत, भरतबहादुर खत्री, शेरबहादुर बस्नेत, डोलुशकुमार केसी अफिसियल बहराइन गएका छन् ।

बहराइनमा नेपाल र घरेलु टोलीबीच चैत ८ र १३ गते हुने फिफा विश्वकप तथा एएफसी एसियन कप छनोटको खेल हुँदैछ ।
एन्फाले अनुरोध गरेको मध्ये टिम डाक्टर राजु डंगोल महर्जन र मिडिया अफिसर गोविन्दराज नेपाललाई सहभागिताका लागि स्वीकृति दिइएको संघ संस्था समन्वय शाखाका प्रमुख चन्द्रकुमार राईले जनाएका छन् ।

टोलीका १० जना भने प्रतियोगितामा सहभागी हुन अनिवार्य नदेखिएले राखेपले एन्फालाई ध्यानाकर्षण गराइसकेको राखेपले जनाएको छ । अन्तर्राष्ट्रिय स्तरको प्रतियोगितामा सहभागिता जनाउँदा परिणाममुखी आवश्यक तयारी गरी सशक्त राष्ट्रिय टिम बनाउन जोड दिनु पर्नेमा आवश्यकता नै नदेखिएको क्षेत्रमा थप आर्थिक व्ययभार हुने अवस्था कुनैपनि कोणबाट सहि नभएकोले राखेपले १० जनाको स्वीकृति नदिएको राखेपले स्पष्ट पारेको छ ।