काठमाडौं (हाम्रो खेलकुद) – बहराइनको रिफ्फा सहर स्थित बहराइन राष्ट्रिय रंगशालामा १२:४५ बजे सुरु हुने नेपाल र घरेलु टोलीमा बीचको विश्वकप छनोट खेलका लागि नेपालको सुरुवाती ११ सार्वजनिक भएको छ । नेपालका मुख्य प्रशिक्षक भिन्सेन्जो अल्बर्टो अनेसेले नेपालको सुरुवाती ११ सार्वजनिक गरेका हुन् ।

दशरथ रंगशालाको खराब अवस्थाका कारण नेपालमा नभई बहराइनमा भइरहेको आजको खेलमा मलेसिया विरुद्धको अनौपचारिक मैत्रीपूर्ण खेलका सुरुवाती ११ ले नै निरन्तरता पाएको छ ।

नेपालको कप्तानी तथा गोल्पोस्टको जिम्मेवारी नियमित गोलरक्षक किरण चेम्जोङले नै लिने छन् । यस्तै रक्षापंक्तिमा सनिश श्रेष्ठ, अनन्त तामाङ, छिरिङ लामा, अभिषेक लिम्बू र सुमित श्रेष्ठ रहनेछन् । अभिषेकको यो राष्ट्रिय टोलीको लागि डेब्यु समेत रहेको छ ।

मिडफिल्डमा उत्सव राई र लाकेन लिम्बू रहनेछन् भने नेपालको अट्याक सम्हाल्ने जिम्मेवारी हिसुव थपलिया, मनिष डाँगी र अन्जन विष्ट माथि रहेको छ ।

समूह ‘एच’ मा २ खेल खेलिसके पनि नेपाल अंकविहीन छ । समूहमा नेपाल र बहराइनसहित यमन र संयुक्त अरब इमिरेट्स (युएई) छन् । नेपालले यसअघि युएईसँग ४–० र यमनसँग २–० ले पराजित भएको थियो ।

बहराइनले ३ अंकसहित तालिकाको दोस्रो स्थानमा छ। युएईसँग २–० ले पराजित बहराइनले यमनमाथि २–० को जित निकालेको थियो।