काठमाडौं (हाम्रो खेलकुद) – फिफा विश्वकप छनोट अन्तर्गतको दोस्रो चरणको खेलमा बहराइन विरुद्ध आज हुने खेलमा नेपालले आश्चर्यलाग्दो टोली छनोट गरेको छ ।

नेपालले ५-० ले हार बेहोरेको पहिलो खेलबाट सुरुवात ११ मा ४ परिवर्तन गरेको छ । पछिल्लो खेलबाट प्रशिक्षक भिन्सेन्जो अलबर्टो अनेसेले घाइते अन्जन विष्टसँगै सुमित श्रेष्ठ, हिसुब थपलिया र मनिष डाँगीलाई परिवर्तन गरेका हुन् । उनीहरूको स्थानमा समिर तामाङ, भरत खवास, जिलेस्पी जंग कार्की र सञ्जीव विष्ट टोलीमा आएका छन् ।

सन्जित र सञ्जीवले गत खेलमा नेपालका लागि डेब्यु गरेका थिए । सोही खेलमा अभिषेक लिम्बू र समीर तामाङले पनि डेब्यु गरेका थिए । अभिषेक सुरुवाती रोजाइमा रहेर नै खेलमा थिए भने डेब्यु गरेका अन्य खेलाडी पछि मैदान पसेका थिए । आजको खेलमा आक्रामक टोली उतार्दै अनेसेली आश्चर्यजनक छनोट गरेका हुन् ।

नेपाल ३ खेलमा अंकविहिन रहँदै समूहको पुछारमा छ । नेपालले युएई विरुद्ध ४-०, यमन विरुद्ध २-० र बहराइन विरुद्ध ५-० को हार बेहोरेको थियो । युएई ९ अंक सहित समूहको शीर्ष स्थानमा छ । यस्तै ६ अंक सहित बहराइन दोस्रो र यमन ३ अंक सहित तेस्रो छन् ।

नेपालको सुरुवाती ११:

किरण चेम्जोङ, सनिश श्रेष्ठ, अनन्त तामाङ, छिरिङ लामा, अभिषेक लिम्बु, उत्सव राई, लाकेन लिम्बू, सञ्जीव विष्ट, जिलेस्पी जंग कार्की, भरत खवास, समिर तामाङ