काठमाडौं (हाम्रो खेलकुद)– ए डिभिजन टोली थ्री स्टार क्लब प्रथम कपिलवस्तु तिलौराकोट गोल्डकपको सेमिफाइनलमा प्रवेश गरेको छ ।

कपिलवस्तुको बुद्ध मैदानमा शनिबार सुरु भएको प्रतियोगिताको उद्घाटन खेलमा थ्री स्टारले कपिलवस्तु ११ लाई ३–० ले हराउँदै अन्तिम चारको यात्रा तय गरेको हो । थ्री स्टारका निरज चौधरीले २ र दीपेश घलेले अर्को गोल गरेका थिए ।

निरजले ३२ औं मिनेटमा थ्री स्टारका लागि पहिलो गोल गरे । त्यसको तीन मिनेटपछि दीपेशले गोल गरेपछि थ्री स्टारले पहिलो हाफमा २–० को अग्रता बनायो । अर्को गोल निरजले ६३ औं मिनेटमा गरे ।

निरज नै खेलको म्यान अफ म्याच घोषित भए र उनले १० हजार रुपैयाँ प्राप्त गरे । कपिलवस्तु जिल्ला फुटबल संघको आयोजनामा सुरु भएको प्रतियोगितामा आइतबार मछिन्द्र क्लब र हनामी बिएफसीबीच प्रतिस्पर्धा हुनेछ ।

चैत २४ गते सम्म चल्ने प्रतियोगितामा नेपाल पुलिस क्लब, त्रिभुवन आर्मी फुटबल क्लब, सहारा फुटबल एकेडेमी र सुदूरपश्चिम ११ पनि सहभागी छन् ।

प्रतियोगिताको विजेता टोलीले ११ लाख ११ हजार १ सय ११ तथा दोस्रो हुने टोलीले ५ लाख ५५ हजार ५ सय ५५ रुपैयाँ प्राप्त गर्नेछ । प्रतियोगिताको सर्वोत्कृष्ट खेलाडीले १ लाख तथा विधागत उत्कृष्ट खेलाडी, प्रशिक्षक र उच्च गोलकर्ताले जनही २५ हजार रुपैयाँ प्राप्त गर्नेछन् ।