विराटनगर (हाम्रो खेलकुद)- सडनडेथमा जित निकाल्दै घरेलु टिम सांग्रिला मोरङ एफए आठौं विराट गोल्डकपको फाइनलमा प्रवेश गरेको छ ।

विराटनगरस्थित सहिद रंगशालामा बुधबार राती भएको पहिलो सेमिफाइनलमा एपिएफ फुटबल क्लबलाई सडनडेथमा हराउँदै सांग्रिला फाइनलमा पुगेको हो ।

निर्धारित ९० मिनेट र थप ३० मिनेटमा गोलरहित तथा टाइब्रेकरमा ३–३ बराबरीपछि खेल सडनडेथमा पुगेको थियो गोल गरेका थिए ।

टाइब्रेकरमा आशिष चापागाई, अभिषेक लिम्बु, उमेश कार्की र किरन राईले गोल गरे । सांग्रिलाका विदेशी खेलाडी एनकेट र सागर तिरुवाको प्रहार एपिएफका गोलकिपर एन्जल श्रेष्ठले बचाए ।

एपिएफका दिपेश धिमाल,कुलदिप कार्कीको प्रहार सांग्रिलाका गोलकिपर विशाल सुनारले रोके । एपिएफका अनिश महर्जन, सुमन श्रेष्ठ र विश्वास उदासले मात्र गोल गरे।

सांग्रिलाले उपाधिको लागि मच्छिन्द्र क्लब र पाहुना टोली सिक्किम ड्रागन भारतमध्ये एक टोलीको सामना गर्नेछ ।
सांग्रिलाका गोलकिपर विशाल खेलको प्लेयर अफ द म्याच घोषित भए र उनले ११ हजार रुपैयाँ पाए ।

सांग्रिलाका प्रशिक्षक रानु राना मगरले विभागीय टोली बलियो भएपनि पुरा समय आफ्नो टोली खेल नियन्त्रण गर्न सफल भएको बताए ।

‘निर्धारित समयमा गोल हुन नसक्नु हाम्रो पनि कमजोरी हो । आउँने म्याचमा सुधार गर्नेछौं,’ उनले भने, ‘दोस्रो सेमिफाइलनमा सिक्कमले जित हात पारे हामीलाई सहज हुने थियो ।’

एपिएफका प्रशिक्षक बुद्धिमान राईले निर्धारित समयमा खेलाडीहरुले पाएको गोल गर्ने अवसर चुकाउँदा पराजय भोग्नु परेको बताए ।