विराटनगर (हाम्रो खेलकुद)– आठौं विराट गोल्डकप फुटबल प्रतियोगिताको उपाधि जित्नेमा दुवै टोली आत्मविश्वासी देखिएका छन् । विराटनगरको सहिद रंगशालामा शनिबार ६ः४५ बजे सुरु हुने फाइनलमा ए डिभिजन टोली मछिन्द्र क्लब र घरेलु टोली सांग्रिला मोरङ एफएले उपाधिका लागि चुनौती पेश गर्नेछन् ।

विराटनगरमा शुक्रबार प्रि–म्याच कन्फ्रेन्समा दुवै टोलीका प्रशिक्षक र कप्तानले उपाधि जित्न प्रयास गर्ने बताएका छन्।मच्छिन्द्रका प्रशिक्षक सन्तोष न्यौपानेले भने, ‘सिजनको तेस्रो उपाधिका रुपमा विराट गोल्डकप जित्ने लक्ष्यको साथ उत्रनेछौं । यसअघि केपी ओली कप र बागमती गोल्डकपको उपाधि जितिसकेका छौं ।’

पहिलो फाइनल पुग्ने लक्ष्य पूरा भएको उल्लेख गर्दै प्रशिक्षक न्यौपाने अब उपाधि जित्ने दोस्रो लक्ष्यका लागि प्रयास गर्ने बताए । उनले थपे, ‘एउटा लक्ष्य पूरा भयो अर्को शनिबार पूरा गर्नेछौं ।’ मच्छिन्द्रका कप्तान विशाल श्रेष्ठले पहिलो पटक फाइनल पुगेकोले नयाँ च्याम्पियन बनेर इतिहास रच्ने दाँउमा रहेको बताए । उनले भने ‘हामीलाई थाहा छ यो प्रतिष्ठित प्रतियोगिता हो । त्यसैले हामी यसलाई उठाउन राम्रो खेल्ने छौ ।’

सांग्रिलाका प्रशिक्षक रानु रानामगरले घरेलु दर्शकको साथ र हौसलाले उपाधि जित्ने दाबी गरे । ‘मच्छिन्द्र राम्रो टिम हो । अनुभवी खेलाडी छन् । त्यही भएर हामी टेक्निकल खेल प्रर्दशन गर्नेछौ,’ उनले भने, ‘हामी ग्राउण्ड लेभलबाट खेल खेल्नेछौं ।’

रानामगरले टोली ४–४–२ को रणनीतिमा खेल्ने बताए । अधिकांश ‘ए’ डिभिजन क्लबका अनुभवी खेलाडी समेट्नुका साथै राम्रो तालमेल भएकाले च्याम्पियन बन्नेमा आफू ढुक्क रहेको उनले बताए ।

सांग्रिलाका कप्तान अभिषेक लिम्बुले घरेलु मैदान र दर्शकको साथमा उत्कृष्ट खेल प्रर्दशन गर्दै उपाधि जित्ने दाबी गरे । ‘हाम्रो खेलले नेपाली दर्शकको मन जित्नेमा आशावादी छौं,’ उनले भने, ‘अघिल्ला खेलको कमजोरी सुधारेर प्रदर्शन गर्ने र च्याम्पियन बन्नेछौं ।’

सांग्रिलाले विभागीय टिम सशस्त्र प्रहरी बल (एपीएफ) र भुटानको आरटिसी एफसीलाई हराउँदै फाइनलमा प्रवेश गरेको हो । क्वाटरफाइलनमा भुटानको आरटिसीलाई ३–२ गोलले हराएको सांग्रिलाले सेमिफाइनलमा एपिएफलाई सडनडेथमा पराजित गर्दै उपाधि नजिक पुगेको थियो ।

विराट गोल्डकपमा पहिलो पटक फाइनलमा पुगेको मच्छिन्द्रले क्वाटरफाइनलमा कोलकाताका साउर्थन समिति २–१ र सेमिफाइनलमा सिक्किम ड्रागान भारतलाई १–० ले हराउँदै फाइनलको यात्रा तय गरेको थियो ।

२०१८ सालमा तत्कालिन महेन्द्र गोल्डकपका रुपमा आयोजित प्रतियोगिताको उपाधि भारतको कलकत्ताले जितेको थियो । घरेलु टोली मोरङ ११ लाई हराउँदै कलकत्ताले उपाधि जितेको थियो ।

२०१९ सालमा आयोजित महेन्द्र गोल्ड कपको उपाधि मोरङ ११ ले उपाधि जितेको थियो । गत वर्ष सातौं विराट गोल्डकपको उपाधि विराटनगर सिटीले जितेको थियो । भारत केरलाको लुका सकर क्लबलाई हराउँदै विराटनगर सिटी च्याम्पियन बनेको थियो ।

चैत १५ देखि सुरु भएको प्रतियोगितामा ३ विदेशीसहित १० टोलीको सहभागिता थियो । गोल्डकपको विजेताले ११ लाख र दोस्रो टोलीले ५ लाख ५० हजार रुपैयाँ प्राप्त गर्नेछ । प्रतियोगिताको सर्वोत्कृष्ट खेलाडीले मोटरसाइकल, उत्कृष्ट प्रशिक्षक, गोलकिपर, सर्वाधिक गोलकर्ताले समान २१ हजार रुपैयाँ प्राप्त गर्नेछन् ।