एजेन्सी – साविक विजेता बायर्न म्युनिखले हार बेहोर्दा बायर लेभरकुसन आफ्नो अपराजित यात्रा कायम राख्दै जर्मन बुन्डेसलिगाको उपाधि नजिक पुगेको छ ।

शनिबार बायर्न म्युनिखले हाइडेनहाइमको मैदानमा २-० को अग्रता लिनका बाबजुद ३-२ को हार बेहोरेको हो । यता लेभरकुसनले भने युनियन बर्लिनको मैदानमा १-० को जित दर्ता गर्दै लिगमा अपराजित यात्रा कायम राख्यो ।

ह्यारी केन र सर्ज जिनाब्रीको गोलमा बायर्नले पहिलो हाफमै २-० को अग्रता लिएको थियो । तर घरेलु टोलीका लागि टिम क्लाइनदेन्स्तले २ तथा केभिन सेसाले १ गोल गर्दै अप्रत्याशित जित दिलाए ।

यता लेभरकुसनले फ्लोरिएन विर्ट्जको गोलमा युनियन बर्लिनमाथि १-० को जित दर्ता गर्दै अंक तालिकामा १६ अंकको अग्रता दिलायो । लिगको ६ खेल बाँकी रहेको अवस्थामा लेभरकुसनले अब अर्को खेल जिते क्लब इतिहासको पहिलो शीर्ष लिग उपाधि जित्नेछ । यता बायर्नको लगातार ११ लिग उपाधिको सिलसिला भने पूर्णविराम लाग्नेछ ।

जाबी अलोन्सोको प्रशिक्षणमा रहेको लेभरकुसनले अर्को आइतबार वेर्डर ब्रेमनको सामना गर्दैछ । त्यसअघि बायर्न म्युनिखले शनिबार कोल्नलाई हराउन नसके आफ्नो खेल अगावै लेभरकुसनले जित्नेछ ।

लेभरकुसन यस सिजन अपराजित रहेको छ । तीन प्रतियोगिताको उपाधि दौडमा रहेको टोलीले जर्मन कपको फाइनल र युरोपा लिगमा क्वाटरफाइनल खेल्दैछ । यता बायर्नले भने लिगमा छैटौं हार बेहोरेसँगै उपाधिविहिन हुने डर बढेको छ । टोलीले अन्तिम आशा रहेको च्याम्पियन्स लिगको क्वाटरफाइनलमा आर्सनलको सामना गर्नेछ ।