सुनिल गाउँले, सिमरा

वीरगञ्ज युनाईटेड क्लब विरुद्ध संघर्षपुर्ण जित निकाल्दै त्रिभुवन आर्मी फुटबल क्लब शनिबार सुरु भएको जीतपुर सिमरा गोल्डकप फुटबल प्रतियोगिताको क्वाटर फाइनलमा प्रवेश गरेको छ ।

आर्मीले पुनरागमन जित निकाल्ने क्रममा वीरगन्जलाई ३–२ ले वीरगन्जलाई हराएको थियो । इन्ज्युरी समयमा फत्तेमान घलेले गरेको गोल खेलको निर्णाय बनेको थियो । घरेलु दर्शकको समर्थन पाएको वीरगञ्ज सुरुवाती अग्रता जोगाउन नसक्दा प्रतियोगिताबाट बाहिरीयो ।

वीरगञ्जका फागुराम चौधरीले पेनाल्टी मार्फत गोल गर्दै ४१ औं मिनटमा टोलीलाई अग्रता दिलाएका थिए । आर्मीका डिफेण्डर सुरज बस्नेतले वीरगञ्जका फागुरामलाई पेनाल्टी बक्समा फाउल गरेपछि फिफा रेफ्री उमेश विंडारीले वीरगन्जलाई पेनाल्टी दिएका थिए ।

तर, पहिलो हाफमै बराबरी गोल गर्दै आर्मी खेलमा फर्केको थियो । कमल थापाले बराबरी गोल गर्दै आर्मीका समर्थकलाई खुसी पारे । ४४ औं मिनटमा सुरजको कर्नरमा कमलले पेनाल्टी बक्सबाट कमलले गोल गरेका थिए ।

खेलको ६१ औं मिनटमा दिनेश हेम्जनले फ्रि किकमा गोल गर्दै आर्मीलाई अग्रता दिलाएका थिए । झण्डै २२ यार्ड टाढाबाट दिनेशले प्रहार गरेको फ्रिकिकलाई वीरगन्जका गोलकिपर प्रमिजय गच्छदारले बचाउने मौका पाएनन् ।

८२ औं मिनेटमा वीरगन्ज खेलमा फर्केको थियो । फागुरामले व्यक्तिगत दोश्रो गोल गर्दै टोलीलाई खेलमा फर्काएका थिए । काउन्टर अट्याकमा आर्मीका गोलरक्षक विकेश कुथुलाई बिट गर्दै फागुरामले गोल गरेका थिए । इन्ज्युरी समयमा फत्तेमानले गरेको गोल निर्णायक बनेको थियो । दिनेशको क्रसमा वीरगञ्जका डिफेण्डरहरुको गल्तीको फाइदा उठाउँदै फत्तेमानले गोल गरेका थिए ।

आर्मीका दिनेश हेम्जन प्लेयर अफ दी म्याच घोषित भए र उनले शुभारम्भ कलेजले प्रयोजन गरेको १० हजार रुपैयाँ सहित ट्रफि प्राप्त गरे । नव जनजागृती क्लबको आयोजनामा सुरु भएको प्रतियोगितामा आइतबार साविक विजेता चर्च ब्वाईज युनाईटेड र सिराहाको सलहेस युवा क्लबबीच प्रतिस्पर्धा हुनेछ ।

त्यसअघि सिमरा रङ्गशालामा युवा तथा खेलकुद मन्त्री बिराजभक्त श्रेष्ठले प्रतियोगिताको उद्घाटन गरेका थिए । कार्यक्रममा एन्फा महासचिब किरण राई, जीतपुरसिमरा उपमहानगरपालिकाका प्रमुख राजन पौडेल लगायतले प्रतियोगिताको सफलताको शुभकामना दिएका थिए ।

आयोजक क्लबले उद्घाटन समारोहका अवसरमा जीतपुरसिमरा उपमहानगरपालिका भित्रबाट फुटबलको विकासमा योगदान पु¥याएका खेलाडी तथा अन्य गरि १७ व्यक्तिलाई सम्मान गरेको थियो ।