सुनिल गाउँले,सिमरा,
साविक विजेता चर्च व्वाईज युनाईटेड क्लबलाई ३-२ मा स्तब्ध पार्दै सलहेश युवा क्लब सिराहा जगदम्बा स्टिल १४ औं जीतपुरसिमरा गोल्डकपको सेमिफाइनलमा प्रवेश गरेको छ ।

सिमरा रङ्गशालामा आइतबार राति भएको प्रतिष्पर्धात्मक खेलको अन्तिम समयमा गोल गर्दै सिराहाले ‘ए’ डिभिजन क्लब चर्च व्वाईज विरुद्ध रोमाञ्चक जित दर्ता गर्यो । खेलको १४ औं मिनटमा सिराहाका लागि आशिष चापाँगाईले गोल गर्दै अग्रता दिलाएका थिए ।

पहिलो हाफ आफ्नो पक्षमा पारेको सिराहा विरुद्ध चर्च ब्वाइजले खेलको ५१ औं मिनटमा बराबरी गोल गर्यो । चर्च ब्वाइजका राजेश परियारले बराबरी गोल गर्दै टोलीलाई खेलमा फर्काएपनि केहिबेरमै आत्मघाती गोलका कारण चर्च व्वाईज पुनः २–१ ले पछाडि पर्यो ।

चर्च ब्वाइजका डिफेण्डर एकराज बुढाथोकीले ६३ औं मिनेटमा बल क्लिएर गर्न खोज्दा गरेको गल्तीले आत्मघाती गोलमा परिणत भएको थियो ।
अनुभवी खेलाडीले भरिएको चर्च व्वाईजले पनि आत्मघाती गोलको फाईदा लिंदै बराबरी गर्यो ।

खेलको ७३ औं मिनटमा सिराहाका कप्तान कुलदिप कार्कीले गोल लाईनबाट क्लिएर गर्न खोजेको बल गोलमा परिणत हुँदा चर्च ब्वाइज खेलमा फर्किएको थियो । खेलको अन्तिम समयमा बराबरी गोल भएपछि चर्च व्वाईजको समर्थनमा रहेका दर्शकको हुटिङ स्मरणिय थियो ।

अन्तिम समयमा भएको बराबरीपछि निर्धारित समयमै खेल आफ्नो पक्षमा पार्न दुबै टिमले आक्रामक खेल खेलेका थिए । तर इन्ज्युरी समयको अन्तिम मिनटमा गोल गर्दै सिराहाले चर्च व्वाईजलाई स्तब्ध बनायो । सिराहाका लागि शिशिर लेखीले ५ मिनटको इन्ज्युरी समयको अन्तिम मिनटमा गोल गरेका थिए ।

केहि सेकेण्ड बाँकी छँदा गोल भएपछि सिराहाका प्रशिक्षक राजिवकुमार यादव उत्साहित हुँदै मैदान भित्रै प्रवेश गरेका थिए ।

सिराहाका शिशिर लेखी प्लेयर अफ दि म्याच बने र उनले १० हजार रुपैयाँ सहित ट्रफि प्राप्त गरे । शुभारम्भ कलेज अफ म्यानेज्मेन्ट सिमराका प्रमुख शम्भु मण्डलले उनलाई पुरस्कार प्रदान गरेका थिए ।

प्रतियोगितामा सोमबार नेपाल एपिएफ फुटबल क्लब र मकवानपुर ११ हेटौंडा बीच खेल हुनेछ ।