सुनिल गाउँले, सिमरा

नेपाल एपिएफ फुटबल क्लब सिमरामा जारी जगदम्बा स्टिल १४ औं जीतपुरसिमरा गोल्डकपको सेमिफाइनलमा प्रवेश गरको छ ।

सिमरा रङ्गशालामा सोमबार राती भएको दोश्रो क्वाटरफाइनलमा मकवानपुर ११ हेटौंडालाई २–० ले हराउँदै एपिएफले अन्तिम चारको यात्रा तय गरेको हो । एपिएफको जितमा विके तामाङ र प्रदिप लामाले समान १ गोल गरे ।

हेटौंडा विरुद्ध शुरुदेखिनै आक्रामक खेल खेलेको एपिएफका लागि खेलको ३० औं मिनटमा विकेले गोल गर्दै अग्रता दिलाएका थिए । विश्वास उदासको क्रस बल सम्हाल्दै हेटौंडाका डिफेण्डर बिट गर्न सफल विकेले पेनाल्टी बक्सबाट गरेको प्रहार गोलमा परिणत भएको थियो ।

पहिलो हाफ आफ्नो पक्षमा पार्न सफल एपिएफले खेलको ६८ औं मिनटमा अग्रता दोब्बर बनायो । एपिएफका प्रदिपले गोल गर्दै टोलीको अग्रता दोब्बर पारे । सुमन श्रेष्ठले प्रहार गरेको कर्नर बललाई पेनाल्टी बक्स भित्र सम्हाल्दै प्रदिपले गोल गरेका थिए ।

दोश्रो हाफमा एपिएएफ विरुद्ध केहि राम्रा अवसर बनाएर पनि फिनिसिङमा चुक्दा हेटौंडाको टोली प्रतियोगिताबाट बाहिरिन बाध्य भयो । एपिएफका गोलरक्षक एन्जल श्रेष्ठले हेटौंडाका उत्कृष्ट प्रहारहरु विफल पारेका थिए ।

एपिएफका गोलरक्षक एन्जल श्रेष्ठ प्लेयर अफ दी म्याच घोषित भए र उनले १० हजार रुपैयाँ, ट्रफि प्राप्त गरे । आन्तरिक राजश्व कार्यालय सिमराका प्रमुख कर अधिकृत राजकुमार खतिवडा र शुभारम्भ कलेज अफ म्यानेज्मेन्टका अध्यक्ष लालप्रसाद पुडासैनीले एन्जललाई पुरस्कार वितरण गरेका थिए ।

प्रतियोगितामा मंगलबार दुई ‘ए’ डिभिजन टोली त्रिभुवन आर्मी फुटबल क्लब र मच्छिन्द्र क्लबबीच प्रतिस्पर्धा हुनेछ । वीरगञ्जलाई हराउँदै क्वाटरफाइनल यात्रा तय गरेको आर्मीले विराट गोल्डकपको उपाधि जितेर सिमरा आएको मच्छिन्द्रले सिधै सेमिफाइनल प्रवेशका लागि खेल्नेछ ।