एजेन्सी – म्यानचेस्टर सिटीका नर्वेली फरवार्ड एर्लिङ ब्राउट हालान्डले चेल्सीविरुद्ध हुने एफए कपको सेमिफाइनल गुमाउने सम्भावना बढेको छ ।

एफए कपको सेमिफाइनलमा आज राति सिटीले चेल्सीसँग वेम्वली स्टेडियममा प्रतिस्पर्धा गर्दैछ । बुधबार च्याम्पियन्स लिगको क्वाटरफाइनलको दोस्रो लेगमा रियल म्याड्रिडसँग टाइब्रेकरमा ४–३ पराजित हुँदा समस्या देखिएपछि हालान्डलाई अन्तिम समयमा परिवर्तन गरिएको थियो ।

सिटीका प्रशिक्षक पेप गुआर्डिओलाले २३ वर्षीय हालान्डलाई बाहिर निकाल्न आग्रह गरेका थिए। ‘हामी हेर्नेछौं ,’ स्पेनिस प्रशिक्षक पेपले वेम्बलीमा प्रिमियर लिग प्रतिद्धन्द्धी चेल्सीको सामना गर्न हालान्डको उपलब्धता बारे भने ।

‘यो एक कठिन खेल थियो, दुवै टोलीले तीब्र फुटबल खेलिरहेका थिए । त्यसमा एर्लिङले केहि असहज महसुस गरे, उनलाई मांसपेशीको समस्या देखिदा उनी आँफैले खेल्न नसक्ने बताएपछि डाक्टरको सल्लाहमा उनलाई बाहिर राख्यौं,’ पेपले भने ।

‘हामीले यस सिजनमा जति खेल खेलिरहेका छौं, यो सामान्य हो… तिनीहरू मानव हुन् । तिनीहरू मेसिन होइनन् । हामी यसमा अभ्यस्त छौं । हामीसँग अर्को विकल्प छैन । प्रिमियर लिगमा ६ खेलहरू बाँकी छ । हामीले उत्कृष्ट प्रदर्शन गर्यौं तर, हामीले जित्न सकेनौं । पेपले थपे ।

यता, चेल्सीका प्रशिक्षक मौरिसियो पोचेटिनो सिटीविरुद्ध जित निकाल्नेमा आशावादी देखिएका छन् । यो सिजन लिगमा चेल्सीले सिटीसँग ४–४ र १–१ गोलको को बराबरी खेलेको छ।

सिजनको सुरुमा कारबाओ कपको फाइनलमा लिभरपुलसँग पराजित भएको चेल्सीमा मिडफिल्डर एन्जो फर्नान्डेज र विंगर रहिम स्टर्लिङ चोटबाट पूनरागमन गर्ने तयारीमा छन् ।

‘हामीलाई राम्रोसँग थाहा छ, जब तपाईं च्याम्पियन्स लिगमा १२० मिनेट खेल्नुपर्छ, रिकभर गर्न सधैं सजिलो हुँदैन ,’ पोचेटिनोले भने, ‘यो सिटीका लागि कठिन हुनेछ, जस्तै यो हाम्रो लागि हुनेछ । तर हामीले सम्झनुपर्छ कि उनीहरुसँग अविश्वसनीय टोली छ ।’