एजेन्सी – विंगर नोनी माडुएकेले एक गोलसँगै एक असिस्ट प्रदान गरेपछि दुई गोलले पछि परेको स्थितिमा पूनरागमन गर्दै लन्डन क्लब चेल्सीले इंग्लिस प्रिमियर लिगमा हार टारेको छ ।

चेल्सीले प्रिमियर लिगको शीर्ष चारको दौडमा रहेको एस्टन भिल्लालाई २–२ गोलको बराबरीमा रोक्दै अंक खोस्न सफल भएको हो । भिल्ला पार्कमा शनिबार राति भएको खेलमा घरेल टोलीका लागि मोर्गान रोजर्सले गोल गर्दा एक गोल उपहार पाएको थियो । चेल्सीका लागि नोनी माडुएके र कोनर गल्लाघेरले गोल गरे ।

खेलको चौथो मिनेटमा नै मार्क कुकुरेलाको आत्मघाती गोलबाट चेल्सी पछि परेको थियो । १६औं मिनेटमा निकोलस ज्याक्सनले गोल गरेपनि भिएआरबाट मान्यता पाएन । ४२औं मिनेटमा मोर्गानले गोल गर्दै भिल्लालाई पहिलो हाफमा २–० को अग्रता दिलाए ।

२–० ले पछि परेको स्थितिबाट दोस्रो हाफ शुरु गरेको चेल्सीले पूनरागमन गर्दै हार टार्यो । ६२औं मिनेटमा माडुएकेले गोल गर्दै चेल्सीलाई खेलमा फर्काउने संकेत दिए । त्यसपछि ८१औं मिनेटमा माडुएकेकै पासमा गल्लाघेरले गोल गर्दै खेललाई २–२ गोलको बराबरीमा ल्याए ।

इन्ज्युरी समयको थप गरिएको पाँचौं मिनेटमा एक्सेल डिसासीले गोल गरेपनि भिएआरबाट मान्यता नपाउँदा चेल्सी जितबाट वञ्चित बन्यो । उनले गोल गर्नु अघि नै फउल भएको भिएआरमा देखाइएको थियो ।

यस बराबरीले भिल्ला ३५ खेलबाट ६७ अंक जोडेर चौथो स्थानमा यथावत छ । भिल्लालाई शीर्षा चारमा रहन टाेटनहमले अंक गुमाउनुपर्ने हुन्छ । तीन खेल कम खेलेको टोटेनहम हटस्परको ६० अंक छ । चेल्सी ३३ खेलबाट ४८ अंक जोडेर नवौं स्थानमा छ ।

अन्य नतिजा
फुलहमविरुद्ध क्रिस्टल प्यालेस (१–१)
म्यानचेस्टर युनाइटेडविरुद्ध बर्नले (१–१)
न्यू क्यासलविरुद्ध सेफिल्ड (५–१)
वल्भ्सविरुद्ध लुटोन (२–१)
एभर्टनविरुद्ध ब्रेन्टफर्ड (१–०)