हिमाल खरेल, झापा
झापाको बुद्वशान्तिमा सुरु भएको तेस्रो आदर्श च्यालेन्ज कप फुटबल प्रतियोगिताको उद्घाटन खेलमा विजयी हुँदै आयोजक आदर्श युवा क्लब सेमिफाइनलमा प्रवेश गरेको छ । ध्रुवतारा स्पोर्टिङ क्लबलाई २-१ले हराउँदै आयोजक अन्तिम चारमा पुगेको हो ।

आयोजकका लागि खेलको १७ औं मिनेटमा कप्तान पुजन थापाले पहिलो गोल गरे । रोमन भुजेलले दिएको क्रसमा पेनाल्टी बक्समा अनमार्क रहेका पुजनले बललाई पोस्टको दिशा दिएका थिए ।

७० औं मिनेटमा मैदानको मध्यभागबाट सिंगल खेल्दै आयोजक टोलीका प्रदीप बुढाथोकीले गोल गर्दै अग्रता दोब्बर बनाए । विपक्षी खेलाडी बिट भइसकेको समयमा प्रदीपले सुन्दर गोल गर्दै आयोजकलाई जिततर्फ अग्रसर पारे ।

खेलको इन्ज्युरी समयमा ध्रुुवताराका सञ्जय धिमालले गोल फर्काए। अनमार्क सन्जयले वान टु वानको स्थितिमा गोल फर्काएका थिए ।

खेल अवधिभर आयोजक आदर्शले ध्रुुवतारामाथि दबाब कायम राखेको थियो । ध्रुवताराले निर्धारित ८० मिनेटको खेलमा विपक्षी टिमविरुद्ध खासै मुुभ बनाउन सकेन ।
खेलको ४५ औङ मिनेटमा ध्रुवताराका रजिन माझीले गरेको फ्रिकिक आयोजकका गोलरक्षक उपेन्द्र लुहागुनले उत्कृष्ट बचाउ गरेका थिए ।

खेलको २३ औं मिनेटमा आयोजक आदर्शका उमेश याङवाले दिएको पासलाई प्रदीपले गोल गर्न सकेनन् । उनको प्रहार विपक्षी गोलरक्षक आयुष लिम्बुले नियन्त्रणमा लिए ।

खेलको प्लेयर अफ द म्याच आयोजजका पुजन थापा भए र उनले ३ हजार रुपैयाँ पुरस्कार पाए । प्रतियोगितामा नेपाल र भारतका ८ टोलीको सहभागिता रहेको प्रतियोगिता संयोजक मनेष दाहालले बताए ।

२०७० सालमा सुरु भएको प्रतियोगिताको २०७१ सालमा दोस्रो संस्करण भएको क्लबका अध्यक्ष मातृका श्रेष्ठले जानकारी दिए ।

प्रतियोगिताको विजेताले २ लाख, दोस्रोले १ लाख रुपैयाँ ट्रफी र मेडल पाउने छन् । प्रतियोगिताका उत्कृष्ट गोलरक्षक, डिफेन्डर, मिडफिल्डर, फरवार्ड र उदीयमान खेलाडीले जनही ५ हजार रुपैयाँ पुरस्कार पाउने छन् ।

बुद्धशान्ति गाउँपालिकाका अध्यक्ष मनोज प्रसाईंले लामो समय स्थगित भएको प्रतियोगिता सुरु गरेकोमा आयोजकलाई धन्यवाद दिए । उनले आगामी वर्षदेखि प्रतियोगितालाई निरन्तरता दिन आग्रह गर्दै गाउँपालिकाले सहयोग जारी राख्ने आश्वासन दिए ।