हिमाल खरेल, बिर्तामोड

बेलबारी एफसी मोरङले तेस्रो बुधबारेमा जारी आदर्श च्यालेन्ज कपमा इलामको रेडहर्स एफसीलाई सहज रुपमा हराउँदै सेमिफाइनलमा स्थान बनाएको छ ।

अन्तिम क्वार्टरफाइनल मंगलबार इलामलाई बेलबारी एफसीले २–० ले पराजित गर्दै सेमिफाइनलमा बिर्तामोड युुनाइटेडसँगको भेट पक्का गरेको छ । बेलबारीको जितसँगै सेमिफाइनल समीकरण पूरा भएको छ ।

खेलको १४औं मिनेटमा विवेक पौडेलको क्रसपासमा प्रशान्त अवस्थीले बेलबारीलाई सुरुवाती अग्रता दिलाएका थिए । पेनाल्टी एरियाबाट उनले गरेको प्रहारलाई विपक्षी गोलरक्षकले बचाउन सकेनन् । खेलमा दोस्रो गोल पनि प्रशान्तको नाममा रह्यो । ४३ औं मिनेटमा सागर तिवारीले पेनाल्टी एरियामा दिएको हेडरलाई सदुपयोग गर्दै प्रशान्तले गोल गरेका थिए ।

दुई विदेशी खेलाडी मैदानमा उतारेको रेडहर्सले गोल गर्ने थुप्रै अवसर सिर्जना गरे पनि असफल भयो । इलामका खेलाडीको पटकपटकको प्रहार बेलबारीका गोलरक्षक पूर्ण चेम्जोङले बचाउ गरेका थिए । खेलको प्लेयर अफ द म्याच बेलबारीका दुुई गोल गर्ने खेलाडी प्रशान्त अवस्थी घोषित भए । उनले ३ हजार रुपैयाँ पुरस्कार पाए ।

पहिलो सेमिफाइनल बुधबार आयोजक आदर्श युवा क्लबले भारतको मानेभन्ज्याङ एफसीको सामना गर्नेछ । प्रतियोगिताको विजेताले २ लाख र दोस्रोले १ लाख ट्रफी र मेडल पाउने छन् । उत्कृष्ट गोलरक्षक, डिफेन्डर, मिडफिल्डर, फरवार्ड र उदीयमान खेलाडीले जनही ५ हजार रुपैयाँ प्राप्त गर्नेछन् ।