ललितपुर (हाम्रो खेलकुद) – कीर्तिपुर नगरपालिका गोदावरी अन्तरपालिका खुल्ला मेयर कप फुटबल प्रतियोगिताको क्वार्टरफाइनलमा प्रवेश गरेको छ ।

गोदावरी १० टाहाखेल–झ्यालुन्टारमा अवस्थित प्रस्तावित गोदावरी बहुउद्देश्यीय रंगशालाको मंगलबार भएको खेलमा तारकेश्वर नगरपालिकालाई ५–० ले हराउँदै कीर्तिपुरले अन्तिम आठमा स्थान बनाएको हो ।

कीर्तिपुरका लागि यमन मर्हजनले ह्याट्रिक गरे भने थप २ गोल इन्द्र बहादुर बस्नेतको नाममा रह्यो । यमनले खेलको नवौं, २५ औं र ४६ औं मिनेटमा गोल ह्याट्रिक पूरा गरे । इन्द्रले ५६ औं र ७० औं मिनेटमा गोल गरे ।

कीर्तिपुरका यमन मर्हजन प्लेयर अफ दि म्याच भए । उनलाई तारकेश्वर नगरपालिकाका मेयर कृष्णहरि मर्हजनले ट्रफि र ५ हजार रुपैयाँको चेक हस्तान्तरण गरे ।

कीर्तिपुरले सेमिफाइनल प्रवेशका लागि मध्यपुर थिमि नगरपालिकासँग वैशाख २२ गते प्रतिस्पर्धा गर्ने भएको छ ।
प्रतियोगितामा कीर्तिपुरसँगै मध्यपुर थिमि, नागार्जुन, चन्द्रागिरी, महालक्ष्मी र दक्षिणकाली नगरपालिका क्वार्टरफाइनलमा पुगिसकेका छन् ।

प्रतियोगितामा उपत्यकाभित्रका १४ वटा पालिकाका १५ वटा टोलीले भाग लिएका छन् । प्रतियोगिताको विजेता टोलीले ५ लाख र दोस्रोले ३ लाख रुपैयाँ प्राप्त गर्नेछ । अनुशासित टोलीले ५० हजार तथा उत्कृष्ट गोलकिपर, डिफेन्डर , फरर्वाड, सर्वाधिक गोलकर्ता र उत्कृष्ट प्रशिक्षकले जनही २५ हजार रुपैयाँ प्राप्त गर्नेछन् ।