एजेन्सी – इंग्लिश प्रिमियर लिग २०२३/२४ सिजनको विजेताको टुंगो आज लाग्दैछ । पछिल्लो तीन सिजनको विजेता म्यानचेस्टर सिटी र आर्सनल मध्य एक टोलीले आज लिग उपाधि उचाल्ने छ ।

लिग लिडर सिटीले आज ८:४५ बजे वेस्ट ह्यामसँग अन्तिम खेल खेल्दैछ । सोही समयमा दोस्रो स्थानमा रहेको आर्सनलले एभर्टनसँग खेल्दैछ । सिटीले आफु अनुकुल नतिजा निकाल्न सके लगातार चौथोपटक प्रिमियर लिगको उपाधि जित्नेछ । सोही समयमा लिगका सबै २० टोली एकैपटक खेल्ने छन् ।

आर्सनललाई च्याम्पियन बन्न एभर्टनविरुद्ध जित र अर्काे खेलमा सिटीले अंक गुमाउनुपर्ने हुन्छ । सिटीको ३७ खेलबाट ८८ तथा आर्सनलको ८६ अंक छ । गोल अन्तरमा पनि यी दुई टोलीबीच खासै भिन्नता छैन ।आर्सनलले २००३ देखि लिग उपाधि जित्न सकेको छैन । सो सिजन आर्सनलले अपराजित रहँदै लिग जितेको थियो ।

प्रिमियर लिगमा यस सिजन शीर्ष चारमा रहँदै अर्को सिजनको च्याम्पियन्स लिग खेल्ने टोलीको समेत टुंगो लागिसकेको छ । सिटी र आर्सनल बाहेक लिभरपुल र एस्टन भिल्ला अर्को सिजन च्याम्पियन्स लिग खेल्नेछन् ।

यस्तै बर्नली र शेफिल्ड युनाइटेड रेलिगेसनमा परिसकेका छन् । लुटन टाउन रेलिगेसनमा पर्ने तेस्रो टोली बन्ने समेत लगभग निश्चित रहेको छ ।