एजेन्सी – युरो कप २०२४ को समूह ‘बी’ मा स्पेन र इटाली विजयी भएका छन् । शनिबार भएका दुई अलग खेलमा स्पेन र इटलीले जित हासिल गरेका हुन् ।

स्पेनले बलियो मानिएको क्रोएसिया लाई ३-० को सहज अन्तरले हरायो । पहिलो हाफमा नै ३ गोल गरेपछि क्रोएसिया खेलमा फर्कन सकेन ।

२९औं मिनेटमा कप्तान अल्भारो मिराटाले गोल गर्दै स्पेनलाई खेलमा अग्रता दिलाएका थिए । पहिलो गोलमा असिस्ट गरेका फाबियान रुइजले उत्कृष्ट फिनिस गर्दै ३२औं मिनेटमा नै अग्रता दोब्बर बनाए । तेस्रो गोल डयानी कार्भाजालले पहिलो हाफको अन्त्यतिर गरे । लामिन यमालको क्रसमा उनले गोल गरेका थिए ।

गएराति भएको अर्को खेलमा इटालीले अल्बानिया माथि २-१ को पुनरागमन जित निकालेको थियो । पहिलो मिनेटमा नै पछि परेको इटालीले पहिलो हाफमा नै २ गोल गर्दै अग्रता लिएको थियो ।

फेदेरिको डिमार्कोको गल्ती पछि नेदिम बाज्रामीले गोल गर्दै पहिलो मिनेटमा अल्बानियालाई अग्रता दिलाएका थिए । तर ११औं मिनेटमा डिफेन्डर अलेसान्द्रो बास्टोनीले हेडर मार्फत गोल गर्दै खेल बराबरीमा ल्याएका थिए।

१६औं मिनेटमा निकोलो बारेलाले उत्कृष्ट गोल गर्दै इटालीलाई अग्रता दिलाएका थिए। अन्त्यमा सो गोल जितका लागि पर्याप्त भन्यो ।

युरो कपमा आइतबार पनि ३ खेल हुँदै छन् । समूह ‘डी’ मा पोल्यान्ड र नेदरल्याण्ड्स साँझ ६:४५ बजे भिड्ने छन् । समूह ‘सी’मा स्लोभेनिया र डेनमार्कबीच राति ९:४५ बजे र राति १२:४५ बजे सर्बिया र इङ्ल्यान्डबीच प्रतिस्पर्धा हुनेछ ।