काठमाडौं (हाम्रो खेलकुद) – अपि पावर चर्च ब्वाइज युनाइटेडले यसै महिना खेल्ने एएफसी च्यालेन्ज लिग प्लेअफको खेल हाम्रो खेलकुदले प्रत्यक्ष प्रसारण गर्ने भएको छ ।

सहिद स्मारक ए डिभजन लिग च्याम्पियनका रुपमा अपि पावर चर्च ब्वाइजले एएफसी च्यालेन्ज कपको प्लेअफमा प्रतिस्पर्धा गर्दैछ । प्रत्यक्ष प्रसारणका लागि चर्च ब्वाइज र हाम्रो खेलकुदबीच शुक्रबार सम्झौता भएको हो । अपि पावर चर्च ब्वाइजका अध्यक्ष टंकलाल (रुबेन) राई र हाम्रो खेलकुदका सम्पादक प्रकाश तिमल्सिनाले सम्झौता पत्रमा हस्ताक्षर गरे ।

चर्च ब्वाइज र भुटानको लिग च्याम्पियन पारो एफसीबीच साउन २९ गते त्रिपुरेश्वरस्थित दशरथ रंगशालामा प्ले अफ खेल हुनेछ ।
चर्च ब्वाइजले यसका लागि तयारी सुरु गरिसकेको छ । अनन्त तामाङको कप्तानीमा रहेको टोलीमा लिग सिजनमा टोलीमा रहेका अन्जन विष्ट र एरिक विष्टले सम्झौता नविकरण गरेका छन् ।

गोलकिपर दीप कार्की,डिफेन्डर सनिश श्रेष्ठ, मिडफिल्डर लाकेन लिम्बु र फरवार्ड आयुष घलान पनि चर्च ब्वाइजमा आबद्ध भएका छन् । चर्च ब्वाइजले केही विदेशी खेलाडीहरुको अनुबन्धका लागि पनि तयारी गरिरहेको बताइएको छ । बालगोपाल महर्जन टोलीको मुख्य प्रशिक्षक रहेका छन् । उनकै प्रशिक्षणमा चर्च ब्वाइजले लिग जितेको थियो ।

पारो विरुद्ध प्लेअफ खेल जितेमा चर्च ब्वाइज एएफसी च्यालेन्ज लिगको समूह चरण पुग्नेछ । प्ले अफ जित्ने टोलीले १ लाख अमेरिकी डलर प्राप्त गर्नेछ । एसियाली फुटबल महासंघ (एएफसी) ले बिहीबार एएफसी क्लब प्रतियोगिता संरचनाको परिमार्जित भागको रूपमा प्रतियोगिताको घोषणा गरेको थियो । प्रतियोगिताको समूह चरणमा १८ टोलीले प्रतिस्पर्धा गर्नेछन् ।

पछिल्लो सिजन दोस्रो तहको एएफसी कपको पहिलो चरणको छनोटमा नेपालको मछिन्द्र क्लबले पारो एफसीलाई नै रंगशालामा हराएको थियो । मछिन्द्र प्लेअफको दोस्रो खेलमा भने भारतीय टोली मोहुन बगान विरुद्ध कोलकत्तामा पराजित भएको थियो ।