सुशिल पन्त क्षेत्री,चितवन

सेन्ट्रल कलेज चितवन जिल्ला ए डिभिजन लिग फुटबलमा शुक्रबार नारायणी फुटबल क्लब ( एनएफसी) र एभरेष्ट क्लब चितवन विजयी भएका छन्।

शारदा नगरको मैदानमा भएको पहिलो खेलमा नारायणीले हर्दी युवा समाजलाई २-१ ले हरायो । नारायणीका‌ सुगम तामाङ र सुरज गुरुङले गोल गरे । हर्दीका सन्तोष थिङले एक गोल गरे ।

खेलमा अग्रता भने हर्दीले लिएको थियो । दोस्रो मिनेटमा सन्तोषले गोल गर्दै हर्दीलाई अग्रता दिलाएका थिए । तर अग्रता धेरै समय टिकेन । एनएफसीका सुगमले खेलको ११ औं मिनेटमा बराबरी गोल गरे । सुरजले ४५ औं मिनेटमा गोल गरेपछि एनएफसीले २ विजयी भयो ।

आजै भएको दोस्रो खेलमा एभरेष्टले यात्रा ग्रुप भरतपुरलाई २-१ ले हरायो । एभरेष्टका किरण घले र सुजल गुरुङले गोल गरे । यात्राका सुनिल पुलामीले एक गोल फर्काए ।

एभरेष्टका किरणले २५ औं मिनेटमा गोल गर्दै अग्रता दिलाएका थिए । ५६ औं मिनेटमा सुजलले गोल गर्दै अग्रता दोब्बर बनाए । यात्राका सुनिलले इन्ज्युरी समयमा गोल गरे पनि हार टार्न सकेनन् ।

लगातारका वर्षाका कारण लिग केही दिन स्थगित गरिएको थियो। लिगमा सोमबार पनि दुई खेल हुनेछन् । पहिलो खेलमा हानामी भरतपुर फुटबल क्लब (बिएफसी) र नारायणी मोटर्स युनिक एफसी भिड्नेछन् । खेल दिउँसो २:३० बजे सुरु हुनेछ । दिउँसो ४:३० बजे रामपुर एफसी र माडी ११ बीच प्रतिस्पर्धा सुरु हुनेछ ।

चितवन जिल्ला फुटबल संघको आयोजनामा जारी लिगलाई‌ सेन्ट्रल कलेज अफ भोकेसनल ट्रेनिङ प्रालिले मुख्य प्रायोजन गरेको छ ।