काठमाडौं (हाम्रो खेलकुद) – ललित स्मृति एन्फा यु-१८ युथ लिगमा शुक्रवार थ्री स्टार क्लब र नेपाल एपिएफ क्लबले जित हात पारेका छन् ।

दिनको दोस्रो खेलमा थ्री स्टार क्लबले खुमलटार युथ क्लबविरुद्ध जित निकालेको छ । सातदोबाटोस्थित एन्फा कम्प्लेक्समा भएको खेलमा थ्रीस्टारले खुमलटारमाथि ४-० को जित निकालेको‌ हो ।

थ्री स्टारलाई सहज जित दिलाउन रोमन श्रेष्ठले २ तथा क्याप्टेन बोगटी र सनिल स्याङताङले समान १ गोल गरे ।
खेलको छैटौं मिनेटमा रोमनको गोलमार्फत थ्रीस्टारले अग्रता लिएको थियो । १० औं मिनेटमा थ्रीस्टारका लागि क्याप्टेनले गोल गर्दै अग्रता दोब्बर बनाए ।

सनिलले ६८ औं मिनेटमा गोल गर्दा थ्रीस्टार ३-० ले अगाडि बढ्यो । ८६ औं मिनेटमा रोमनले व्यक्तिगत दोस्रो गोल गर्दै थ्रीस्टारलाई सहज जित दिलाए ।

चौथो जितसँगै थ्री स्टारले ८ खेलमा १४ अंक जोडेको छ । सातौं हार बेहोरेको खुमलटारको समान ८ खेलबाट ३ अंक छ ।

दिनको पहिलो खेलमा एपिएफले चर्च ब्वाइज युनाइटेडविरुद्ध जित निकाल्यो । अघिल्ला चार खेलमा पराजित बेहोरेको एपिएफले सादोबाटोस्थित एन्फा कम्प्लेक्समा चर्च ब्वाइज युनाइटेडविरुद्ध २-१ को जित दर्ता गर्यो ।

एएिफलाई जित दिलाउन अमन मोक्तान र पवन पाख्रिनले गोल गरे । चर्च ब्वाइजका लागि शिशिर यस्मालीले सान्त्वना गोल फर्काए ।

खेलको २१ औं मिनेटमा अमनको गोलमार्फत एपिएफले अग्रता लिएको थियो । ६९ औं मिनेटमा शिशिरले चर्च ब्वाइजलाई बराबरीमा ल्याए ।

९०औं मिनेटमा पवनले पेनाल्टीमार्फत गोल गर्दै एपिएफलाई जित दिलाए । इन्ज्युरी समयमा सुजन बस्नेतले दोहोरो पहेंलो कार्ड बेहोर्दै मैदान छाडेपछि चर्च ब्वाइज १० खेलाडीमा समेटिएको थियो ।

तेस्रो जितसँगै एपिएफले ८ खेलमा १० अंक जोडेको छ । तेस्रो पराजय बेहोरेको चर्च ब्वाइजको समान ८ खेलबाट १३ अंक छ ।