काठमाडौं (हाम्रो खेलकुद)- अखिल नेपाल फुटबल संघ (एन्फा) को अर्को साता बस्ने केन्द्रिय कार्यकारी समितिको बैठकका‌ लागि ४ वटा एजेण्डा थप गर्न सदस्य पेमा डोल्मा लामा माग गरेकी छिन्।

एन्फा महासचिव किरण राईलाई शुक्रवार पत्र लेख्दै लामाले ४ वटा एजेण्डा थप्न आग्रह गरेकी हुन् । एन्फा केन्द्रिय‌ कार्यकारी समितिको बैठक भदौ ११ लाई डाकिएको छ।

लामाले महिला तथा पुरुष खेलाडीहरुको मासिक तलब भत्ता तलब वृद्धि, राष्ट्रिय महिला टिमको लागि विदेशी प्रशिक्षकको नियुक्ति, महिला लिगको पुरस्कार र मिशन वल्र्डकप २०२७-३१ का सम्बन्धको एजेण्डा थप गर्न माग गरेकी हुन् ।

शुक्रवार नै एन्फा अध्यक्ष पंकज विक्रम नेम्वाङलाई सम्बोधन गर्दै लेखेको‌ पत्रमा उपाध्यक्ष विराटजंग शाहीले ६ वटा एजेण्डा थप्न आग्रह गरेका छन्‌।

उपाध्यक्ष शाहीले अन्तर्राष्ट्रिय (महिला र पुरुष) खेलाडीहरुको वर्गिकरण र सेवा सुविधा, फिफाद्धारा स्वीकृत भेडावारी परियोजना, रेफ्री तथा प्राविधिकको तलब वृद्धि सम्बन्धमा एजेण्डामा‌ थप्न अनुरोध गरेका छन् ।

त्यस्तै आर्थिक वर्ष आव २०८०/ ८१ को आन्तरिक लेखा परिक्षण प्रतिवेदन, , विश्व कप दोश्रो चरण अन्तर्गतका खेलहरुको आर्थिक विवरण र एन्फाको उपाध्यक्ष दावा लामाको विषयमा वरिष्ठ उपाध्यक्षको उजुरी र राखेपको पत्रका‌ सम्बन्धमा पनि बैठकको‌ एजेण्डामा थप्न शाहीले पत्रमा उल्लेख गरेका छन्।