दिपक बोहोरा, ताप्लेजुङ

फुटबल नेपालमा लोकप्रिय खेल मध्ये पर्दछ। देशको जुनै ठाउँमा फुटबल होस् दर्शकमा बेग्लै उत्साह हुन्छ। देशमा हुने साना ठूला प्रतियोगितामा शुल्क नै तिर्नुपर्ने खेल नेपालमा सम्भावत फुटबल मात्रै होला। त्यसअर्थ दर्शकहरु पैसा तिरेर फुटबल हेर्न तयार छन् । चाँहे त्यो संघिय राजधानी काठमाडौंमा होस् वा जिल्ला।

यसैबीच हिमाली जिल्ला ताप्लेजुङमा सोमबार दोश्रो ताप्लेजुङ गोल्डकप फुटबल प्रतियोगिता सम्पन्न भएको छ । ए डिभिजन टोली त्रिभुवन आर्मी फुटबल क्लबसहित ८ वटा टोलीकि सहभागिता रहेको प्रतियोगिताको उपाधि मोरङको सगरमाथा फुटबल क्लबले जितेको थियो।

लाखेजात्रा संचालन समितिको आयोजनामा जनै पूर्णिमाको दिन सुरु भएको प्रतियोगिताको कृष्णजन्माष्टमीको दिन फाइनल हुने गर्दछ । गत वर्षबाट ताप्लेजुङ गोल्डकपको नाममा हुने थालेको प्रतियोगितामा हिमाली जिल्लामा फुटबलको क्रेज लोभ लाग्दो देखिएको फुटबलकर्मी दिलिप राईले हाम्रो खेलकुद बताए ।

पानीको पर्वाह नगरी दर्शकले फुटबल फाइनलको मजा लिएका थिए। प्रतिकुल मौसमका बाबजुद भदौ १० गते भएको त फाइलमा टिकट विक्रीबाट मात्र १० लाख रुपैयाँ भन्दा बढी रकम संकलन भएको आयोजक संस्थाले जनाएको छ ।

सगरमाथा फुटबल क्लब र सिराहाको सलेहस फुटबल क्लबबीच फाइनल भएको थियो । फाइनलको टिकट विक्रीबाट गत वर्ष भन्दा यो वर्षको अढाई लाख भन्दा बढि उठेको थियो।

गत वर्षको फाइनलमा ७ लाख ५५ हजार रुपैयाँ संकलन भएको थियो भने यसपटक १० लाख १४ हजार रुपैयाँ संकलन भएकाे लाखेजात्रा संचालन समितिका कोषाध्यक्ष निरोज श्रेष्ठले जानकारी दिए ।

यसपटक टिकट विक्रीबाट २३ लाख ७६ हजार रुपैयाँ संकलन भएको बताइएको छ । स्थानिय रुपमा आयोजित फुटबलको टिकट विक्रीबाट मात्र यो‌ रकम संकलन हुनु सामान्य होइन ।

संघर्ष स्पोर्टिङ युवा क्लब ताप्लेजुङ र भारतको कञ्चनजंघा फुटबल क्लब सिलिगुढीबीचको उद्घाटन खेलमा टिकटबाट २ लाख २० हजार रुपैयाँ संकलन भएको थियो ।

सलहेस र पाँचथर फुटबल क्लबबीचको दोस्रो खेलमा १ लाख ३५ हजार १ सय, तेश्रो दिन १ लाख ४० हजार ८ सय र चौथो दिन दिन २ लाख १३ हजार रुपैयाँको टिकट बिक्री भएको आयोजक समितिका अध्यक्ष देवराज गुरुङले जानकारी दिए ।

त्यस्तै पहिलो दिन सेमिफाइनलमा ३ लाख ८ हजार ८ सय रुपैयाँ र दोश्रोमा ३ लाख ४४ हजार रुपैयाँको टिकट बिक्री भएको समितिले जनाएको छ ।

खेलकुद प्रतियोगितामा‌ दर्शकले भाषण खासै रुचाउँदैनन्। सायद त्यसैलाई ध्यानमा राखेर होला यसपटक ताप्लेजुङ गोल्डकप भाषण रहित भएको थियो। अतिथीहरुलाई आसन ग्रहण भने गराइएको थियो।