पोखरा(हाम्रो खेलकुद) – गत वर्ष आयोजना भएको २३औं संस्करणको आहा रारा पोखरा गोल्ड कपमा १५ लाख रुपैयाँ भन्दा बढी घाटा भएको छ ।

आयोजक सहारा क्लब पोखराले बिहीवार गोल्डकपको खर्चविवरण प्रस्तुत गर्दै १५ लाख ३८ हजार ४ सय ६६ रुपैयाँ घाटा भएको जनाएको छ ।

सहारा अनुसार गोल्डकपबाट ९९ लाख ९५ हजार ४ सय ५१ रुपैयाँ आम्दानी भएको थियो । क्लबमा महासचिव रामजी प्रसाद अधिकारीका अनुसार गोल्डकपमा १ करोड १५ लाख ३३ हजार ९ सय १७ रुपैयाँ खर्च भएको थियो ।

सहारा क्लब पोखरा द्वारा संचालित कठिन परिस्थिति एंव विपन्न वर्गका बालकहरु सम्मिलित सुर्य बहादुर के.सी. स्मृति सहारा फुटबल एकेडेमीको सहयोगार्थ गोल्ड कप आयोजना हुँदै आएको छ।

‘देशव्यापी रुपमा देखा परेको आर्थिक मन्दी र राष्ट्रिय फुटबल खेलाडीहरुको विदेश पलायनले नेपालको राष्ट्रिय फुटबलको रौनक घट्‌दै गएको कारण प्रतियोगिता संचालनमा निकै चुनौती रहेको थियो,’ सहाराका महासचिव अधिकारीले भने ।

प्रतियोगिताको २३ औं संस्करण गत वर्ष माघ ८ देखि २० गते सम्म रंगशालामा आयोजना भएको थियो ।
१२ टोलीको‌ सहभागिता रहेको २३ औं आहा ! रारा पोखरा गोल्ड कपमा त्रिभुवन आर्मी फुटबल क्लब च्याम्पियन बनेको‌ थियो। थ्री स्टार क्लब ललितपुरलाई हराउँदै आर्मी विजयी भएको थियो।

हिमश्री फुड्सले मुख्य प्रायोजन गरेको आहा रारा पोखरा गोल्ड कपको संरक्षक पोखरा महानगरपालिका, उप-प्रायोजकहरु पोखरा वडा.न. ९, बाँस्तोलाथर, चरक मेमोरियल हस्पिटल नागढुङ्गा रहेका थिए।

विशेष सहयोगी संस्थाहरुमा राखेप, प्रदेश खेलकुद परिषद गण्डकी, सहारा युके, सहारा क्लब हङ्गकङ्ग, सहारा क्लंब अष्ट्रेलिया, कास्की जिल्ला खेलकुद विकास समितिलगायत थिए।