काठमाडौं (हाम्रो खेलकुद)- सांग्रिला युथ एफसीले चौथो इन्ट्रा कप‌ फुटबल प्रतियोगिताको उपाधि जितेको छ।

अमेरिकाको एर्कोनमा भएको प्रतियोगिताको फाइनलमा पथरी एफसीलाई १-० ले हराउँदै सांग्रिलाले उपाधि जितेको हो। समिर गुरुङको गोलमा सांग्रिलाले फाइनल जितेको थियो।

सांग्रिलाले १० तोलाको‌ सुनको ट्रफीसहित १५ हजार अमेरिकी डलर प्राप्त गरेको छ। त्यसअघि सेमिफाइनलमा पथरीले चुके एफसीलाई पेनाल्टी सुट आउटमा र सांग्रिलाले तिमाई स्क्वार्डलाई ५-१ ले हराउँदै फाइनल भेट पक्का गरेका थिए।

व्यक्तिगत अवार्डमा पनि सांग्रिलाका खेलाडीको बाहुल्यता रह्यो। सांग्रिलाका विक्रम हुमागाईं उत्कृष्ट गोलकिपर, निराजन चौधरी उत्कृष्ट डिफेन्डर, रोजिन प्रजापति उत्कृष्ट मिडफिल्डर, मनोज चौहान उत्कृष्ट फरवार्ड, समिर गुरुङ सर्वोत्कृष्ट खेलाडी तथा किरण थापा उत्कृष्ट प्रशिक्षक घोषित भएका थिए।

पिस जोन कपसँगको सहकार्य इन्ट्रा नेसनल वेलफेयर एन्ड सर्पोट फाउन्डेसनले प्रतियोगितामा आयोजना गरेको हो। कोप्ले सकर कम्प्लेक्समा तीन दिनसम्म चलेको प्रतियोगितामा महिला, पुरुष ३० वर्ष माथि र भेट्रान्सको पनि प्रतिस्पर्धा भएको थियो।

समापनका अवसरमा आयोजकले मेरो‌ डान्सिङ युनिभर्सल र मेरो डान्स युनिभर्सको दोस्रो संस्करणको घोषणा गरेको थियो। इन्ट्रा फाउन्डेसनका अध्यक्ष डिल्ली अधिकारीले प्रतियोगितामा सहयोग गर्ने सबैलाई धन्यावाद दिए।