काठमाडौं(हाम्रो खेलकुद) – दोस्रो चरण प्रवेशका लागि वालिङ नगरपालिका र कोशी प्रदेश जित्नै पर्ने दबाबका साथ आजको एन्फा महिला लिग अलग अलग खेलमा प्रतिस्पर्धा गर्नेछन् ।

पहिलो खेलमा वालिङले चन्द्रपुर नगरपालिकाको सामना गर्दैछ । एन्फा कम्प्लेक्स सातदोबाटोमा हुने खेल दिउँसो १२ः३० बजे सुरु हुनेछ।

यो खेलमा वालिङ विजयी भएमा शीर्ष ५ मा रहँदै दोस्रो चरणका लागि छनोट हुनेछ । यदी यदि चन्द्रपुरले जित निकालेको अवस्थामा पनि वालिङको सम्भावना यथावत रहन्छ । तर, त्यसका लागि शुक्रबार हुने खेलमा एपिएफले बागमतीसँग अंक खोस्नु पर्नेछ ।

वालिङ ८ खेलमा १२ अंकका साथ चौथो स्थानमा छ । चन्द्रपुर समान खेलमा ८ अंकका साथ आठौं स्थानमा छ ।

आज नै हुने दोस्रो खेलमा कोशी प्रदेश र सुदूरपश्चिम प्रदेश खेल्दैछन् । खेल दिउँसो ३:३० मा सातदोबाटोस्थित एन्फा कम्प्लेक्समा हुँदैछ ।

खराब प्रदर्शनका कारण अंकबिहीन रहँदै सुदूरपश्चिम पहिलो चरणबाटै बाहिरिकेको छ । कोशी भने यस खेलमा जित निकाल्दै दोस्रो चरणमा पुग्ने योजनामा छ । कोशी ८ खेलमा ११ अंकका साथ पाँचौ स्थानमा छ । सुदूर भने अंकबिहीन रुपमा तालिकाको पुछारमा रहेको छ ।

यसअघि नै विभागीय टोलीहरु एपिएफ, आर्मी र नेपाल पुलिस दोस्रो चरणमा प्रवेश गरिसकेका छन् । अखिल नेपाल फुटबल संघ(एन्फा) को आयोजनामा जारी लिगमा १० टोलीको सहभागिता रहेको छ ।

सहभागी टोलीले पहिलो चरणमा एक अर्का विरुद्ध खेल्नेछन् । पहिलो चरणमा शीर्ष ५ मा रहने टोली दोस्रो चरणका लागि छनोट हुनेछ ।