सुमन अधिकारी, बुटवल

दोस्रो हाफको सुरुवात सम्म रहेको २–० अग्रता जोगाउन नसक्दा गोर्खा ब्वाइज स्पोर्टस क्लब रुपन्देहीमा जारी ३६ औ झरना रनिङ शिल्ड फुटबल प्रतियोगिताको सेमिफाइनलबाट बाहिरिएको छ ।

बिहीवार प्रतियोगिताको दोस्रो सेमिफाइनलमा आयोजक झरना स्पोर्टस क्लबसँग ३–२ ले पराजित भएसँगै गोर्खा बाहिरिएको हो । झरना स्पोर्टस क्लबले शनिवार हुने फाइनलमा लिस्नु युवा क्लबको सामना गर्नेछ ।

स्वर्गिय खगी गुरुङसेनीको पुण्य स्मृतिमा जारी प्रतियोगिताको कुन्जलापुरस्थित फुटबल मैदानमा गोर्खा ब्वाइजले पहिलो हाफमा २ गोलको अग्रता बनाएको थियो । तर दोस्रो हाफमा टोली सम्हालिन सकेन र पराजित भएको थियो ।

दोस्रो हाफमा खेलमा फर्कदै झरनाले ४९ औं र ७७ औं मिनेटमा गोल गर्दैै खेलमा बराबबरी गरेको थियो । इन्ज्युरी समयको चौथो मिनेटमा गोल गर्दै झरनाले फाइनलको यात्रा तय गरेको थियो ।

खेलको चौथो मिनेटमा गोर्खा ब्वाइजका अनिल रानामगरले गोल गर्दै टोलीलाई अघि बढाएका थिए । ३२ औं मिनेटमा विदेशी खेलाडी रिचार्डले गोल गर्दै टोलीको अग्रतालाई दोब्बर पारेका थिए । अनिल रानामगरको क्रसमा रिचार्डले गोल गरेका हुन् ।

झरनाका एरोन थापाले ४९ औं मिनेटमा र ७७ औं मिनेटमा जितेश गुरुङले गोल गर्दै खेललाई बराबरीमा पुर्याएका थिए । इन्ज्युरी समयमा एलेक्स भिक्टरले निर्णायक गोल गरेका थिए ।

झरनाका सन्तोष खत्री प्लेयर अफ दी म्याचबाट पुरस्कृत भए। प्रतियोगिताको उपाधि विजेताले ३ लाख ३१ हजार रुपैयाँ र दोस्रो हुने टोलीले १ लाख ८१ हजार रुपैयाँ प्राप्त गर्नेछ ।