काठमाडौं (हाम्रो खेलकुद)– फुटबलर्स मिसन टुगेदरको आयोजनामा जारी दोश्रो भेट्रान्स फुटबल प्रतियोगितामा सोमवार चितवन भेट्रान्स टिम, बानेश्वर फ्रेण्ड्ससिप र फ्रिडम फाइटर विजयी भएका छन् ।

थिमीस्थित मध्यपुर युथ एसोसियसनको खेल मैदानमा भएको पहिलो खेलमा चितवनले हिमालयन शेर्पा भेट्रान्सलाई पेनाल्टी सुटआउटमा ५–४ ले पराजित गरेको छ । निर्धारित समय गोलरहित सकिए पछि खेल ट्राइब्रेकरमा पुगेको हो । चितवनका गोलकिपर शंकर महर्जन प्लेयर अफ दी म्याच घोषित भए । उनलाई अखिल नेपाल फुटबल संघ (एन्फा) का पूर्व अध्यक्ष कर्माछिरिङ्ग शेर्पाले पुरस्कृत गरे ।

दोश्रो खेलमा बानेश्वर फ्रेण्डसिपले महावीर क्लबलाई ४–० गोलले पराजित गर्यो । बानेश्वरका हरिहर थापाले ह्याट्रिक र दिपेन्द्र चौधरीले अर्को गोल गरे । बानेश्वरका हरिहर थापा प्लेयर अफ दी म्याच घोषित भए र उनलाई राष्ट्रिय फुटसल टोलीका पूर्व प्रमुख प्रशिक्षक गौरव वस्नेतले पुरस्कृत गरे ।

तेश्रो तथा अन्तिम खेलमा कृष्ण शाक्यको ४ गोलको मद्दतमा फ्रिडम फाइटरले संयुक्त अनुभवी क्लबलाई ६–१ ले पराजित गर्यो । कृष्णबाहेक फ्रिडमका लागि दिपक लामा र कृष्ण मालाकारले समान १ गोल गरे । संयुक्त अनुभवीका रुद्रबहादुर खड्काले गोल गरे । फ्रिडमका कृष्ण शाक्य प्लेयर अफ दी म्याच घोषित भएर उनलाई पि सुजका निर्देशक सागर मणी कोइरालाले पुरस्कृत गरे ।

प्रतियोगितामा मंगलवार पहिलो खेल त्रिभुवन आर्मी फुटबल क्लब र धरान सिटी, दोश्रो खेल फाप्ला स्पोर्टस क्लब, धनगढी र किंकम स्पोर्टस क्लब तथा तेश्रो तथा अन्तिम खेल एनआरटी र बगर भाई खलक, पोखराबीच हुने आयोजकले जनाएको छ ।