एजेन्सी – सर्बियासँग सोमवार गोलरहित बराबरी खेल्दै डेनमार्क युइएफए नेसन्स लिगको क्वाटरफाइनलमा पुगेको छ।

लिग ए समूह ४ मा दोस्रो स्थानमा रहँदै अघिल्लो चरणमा पुग्नका लागि डेनमार्कलाई कम्तीमा बराबरी आवश्यक थियो।

सोही समूहको अर्को खेलमा स्पेनले स्विट्जरल्यान्डलाई ३-२ ले हरायो । इन्ज्युरी समयको तेस्रो मिनेटमा ब्रायन जारागोजाले पेनाल्टीबाट गोल गरेपछि स्पेन विजयी भएको हो ।

यसअघिनै क्वाटरफाइनल पुगिसकेको स्पेन ६ खेलमा १६ अंकसहित शीर्षस्थानमा, ८ अंकको डेनमार्क दोस्रो स्थानमा रह्यो ।

सर्बिया ६ अंक जोडेर तेस्रो स्थानमा र जितविहीन स्विट्जरल्यान्ड (२अंक) यसअघिनै घटुवा भइसकेको छ । स्विट्जरल्यान्ड दुई अंकका साथ पुछारमा छ ।

त्यस्तै लिग सी समूह ३ मा बुल्गेरिया र बेलारुसले १-१ तथा लक्जेम्बर्ग र नर्थन आयरल्यान्डले २–२ को बराबरी खेले ।

लिग सी समूह २ मा कोसोभोले लिथुवानियालाई १- ० र रोमानियाले साइप्रसलाई ४- १ ले पराजित गर्यो।

क्रोएसिया क्वाटरफाइनलमा

पोर्चुगलसँग १-१ को बराबरी खेल्दै क्रोएसियाले अन्तिम आठमा स्थान पक्का गरेको हो ।

पोर्चुगल यसअघिनै प्रतियोगिताको अन्तिम ८ मा पुगिसकेको  थियो। लिग ए‌ समूह १ मा पोर्चुगलले‌ १४ र क्रोएसियाले ८  अंक जोडेको छ।

स्टेडियम पोलजुडमा   क्रिस्टियानो रोनाल्डोसहित केही स्टार खेलाडीलाई विश्राम दिएका खेलको ३३औं मिनेटमा जोआओ फेलिक्सले  गोल गर्दै पोर्चुगललाई अग्रता दिलाए ।

६५औं मिनेटमा  जोस्को ग्भार्डियोलले गोल गरेपछि क्रोएसिया क्वाटरफाइनलमा पुगेको हो।

सोही समूहमा स्कटल्याण्डले पोल्याण्डलाई २-१ ले हराउँदै तेस्रो स्थानमा उक्लिएको छ । ६ खेलको समाप्तिमा स्कटल्याण्डको ७ र पोल्याण्डको ४ अंक छ।