काठमाडौं (हाम्रो खेलकुद)- प्याब्सन बुढानिलकण्ठ र ए डिभिजन टोली हिमालयन शेर्पा क्लबबीच ग्रासरुट फुटबल कार्यक्रम संचालनका लागि सम्झौता भएको छ ।

स्थानीय स्तरमा फुटबल खेलकुदको प्रवर्द्धन र नयाँ प्रतिभाको पहिचानका लागि बिहीवार सम्झौता भएको हो।

सम्झौताअनुसार, बुढानिलकण्ठ नगरपालिका भित्रका विद्यालयका बालबालिकालाई लक्षित गरी फुटबल प्रशिक्षण कार्यक्रम संचालन हुने बताइएको छ ।

बालबालिकाहरूमा फुटबल खेलप्रति रुचि र सहभागिता बढाउने तथा विद्यालयस्तरमा फुटबल प्रशिक्षण कार्यक्रममार्फत युवा प्रतिभाको पहिचान र विकास गर्ने रहेको छ ।

क्लबले अनुभवी प्रशिक्षकहरू उपलब्ध गराउनुका साथै स्थानीय समुदायमा प्रशिक्षक उत्पादन गर्ने तथा प्याब्सन बुढानिलकण्ठले नगरपालिकाभित्रका विद्यालयहरूमा फुटबलसम्बन्धी कार्यक्रम संचालन गर्न समन्वय गर्नेछ ।

बालबालिकाको खेल स्तर वृद्धि गर्न विभिन्न प्रतिस्पर्धा र विकासमूलक गतिविधिहरूको आयोजना गर्ने बताइएको छ।

‘यो कार्यक्रम बालबालिकाको समग्र व्यक्तित्व विकास र समुदायमा स्वस्थ जीवनशैली प्रवर्द्धन गर्न महत्वपूर्ण हुनेछ,’ प्याब्सन बुढानिलकण्ठका अध्यक्ष राधेश्याम श्रेष्ठले बताए ।

साझेदारीमार्फत नयाँ प्रतिभा पहिचान गरी राष्ट्रिय तथा अन्तर्राष्ट्रिय स्तरमा प्रतिस्पर्धा गर्न सक्षम खेलाडी उत्पादन गर्ने लक्ष्य लिएको हिमालयन शेर्पा क्लबका अध्यक्ष कर्माछिरिङ शेर्पाले बताए ।