पाँचथर (हाम्रो खेलकुद) – फिदिममा जारी एघारौं फाल्गुनन्द गोल्डकप प्रतियोगितामा न्यू रोड टिम (एनआरटी) लाई पराजित गर्दै मच्छिन्द्र फुटबल क्लब फाइनलमा प्रवेश गरेको छ ।

फिदिम माविको मैदानमा आज भएको अन्तिम सेमिफाइनल खेलमा एनआरटीविरुद्ध १-० को साँघुरो जित निकाल्दै मच्छिन्द्र उपाधि नजिक पुगेको हो । एनआरटी पराजित भएसँगै पूर्वमा चर्च ब्वाइज युनाइटेडले लगातार तेस्रो पटक एनआरटीसँग फाइनल खेल्नु नपर्ने भएको छ । फाल्गुनन्द गोल्डकपको फाइनलमा मच्छिन्द्रले ए डिभिजन लिग च्याम्पियन चर्च ब्वाइजसँग भेट पक्का गरेको छ ।

सेमिफाइनलमा मच्छिन्द्रका लागि खेलको १०औं मिनेटमा दयानन्दले गरेको गोल नै निर्णायक बनेको थियो । विजु भुजेलको फ्लिक हेडरमा आएको बललाई उनले गोलको दिशा दिएका थिए । दयानन्दको प्रहारलाई एनआरटीका गोलरक्षक प्रमिजय गच्छदारले बचाउने अवसर नै पाएनन् ।

केही अवसर सिर्जना गरे पनि एनआरटी स्कोर गर्न चुकेको थियो । एनआरटीका कप्तान अन्जन विष्टको केही राम्रा प्रहार मच्छिन्द्रका गोलरक्षक विशाल श्रेष्ठले रोकेका थिए । खेलको प्लेयर अफ दी म्याच मछिन्द्रका देवेन्द्र तामाङ भए । उनले नगद १० हजार पाए ।

यस गोल्डकपको विजेताले नगद १० लाख र उपविजेताले नगद ५ लाख पाउने आयोजकले जनाएको छ । फाइनल सोमबार हुनेछ ।