एजेन्सी – शीर्षस्थानको लिभरपुलले इंग्लिस प्रिमियर लिगमा आइतवार वेस्ट ह्याम युनाइटेडलाई हराएको छ ।

वर्षको अन्तिम खेलमा लिभरपुलले वेस्ट ह्यामलाई ५-० पराजित गरेको हो । वेस्ट ह्यामको घरेलु मैदानमा लिभरपुलको जितमा लुइस डियाज, कोडी गाक्पो, मोहम्मद सलाह, ट्रेन्ट एलेक्जेन्डर–आर्नोल्ड र डिओगो जोटाले गोल गरे ।

डियाजले ३०औं मिनेटमा पहिलो गोल गरे । त्यसको १० मिनेटपछि गाक्पोले गोल गर्दै अग्रता दोब्बर बनाए ।

खेलको ४४औं मिनेटमा सलाह गोल गरेपछि पहिलो हाफमा लिभरपुल ३-० ले अगाडि रह्यो। आर्नोल्डले ५४औं र जोटाले ८४औं मिनेटमा गोल गर्दै लिभरपुलको फराकिलो जित निश्चित गरे ।

लिभरपुलको १८ खेलबाट ४५ अंक पुगेको छ । दोस्रो स्थानको नटिङ्घम फोरेस्टको ३७ अंक छ । वेस्ट ह्याम १९ खेलबाट २३ अंकका साथ १३औं स्थानमा छ ।

अर्को खेलमा साभिन्हो र इर्लिङ हालान्डको गोलमा म्यानचेस्टर सिटीले लेस्टर सिटीलाई २-० ले हराएको छ।
सिटीको प्रशिक्षकका रुपमा पेप ग्वार्डिओलाको ५ सयौं खेल सुखद रह्यो। हालान्ड ४ खेलपछि गोल गर्न सफल भए ।

साभिन्होले २१ औं मिनेटमा सिटीले पहिलो गोल गरे। हालान्डले ७४ औं‌ मिनेटमा हेड मार्फत गोल गरे । सबै खाले प्रतियोगितामा १४ खेलमा सिटीको यो दोस्रो जित हो।

लेस्टरले गोलको राम्रो मौका पाएर पनि गोल गर्न सकेन । जिमी भार्डी मौकाको उपयोग गर्न चुके।

रुड भान निस्टलरोयको टोली १८ औं स्थानमा छ। पाँचौं स्थानमा उक्लेको सिटी (३१ अंक) को चौथो स्थानको चेल्सीको भन्दा ४ अंक कम छ।

अन्य खेलमा नटिङघम फरेस्टले एभर्टनलाई २-० ले , क्रिस्टल प्यालेसले साउथह्यामटनलाई २-० ले हरायो। टोटेनहम र वल्भ्स तथा फुलहम र बोर्नमाउथले समान २-२ को बराबरी खेले।