काठमाडौं (हाम्रो खेलकुद)- एन्फा महिला लिगको अन्तिम चरणको पहिलो खेलमा विभागीय टोली त्रिभुवन आर्मी क्लबले विजयी सुरुवात गरेको छ।

विमला चौधरीको २ गोलमा आर्मीले बागमती युथ क्लबलाई २-० ले सहज नतिजामा पराजित गर्यो।
एन्फा कम्प्लेक्समा भएको खेलमा बागमती विरुद्ध २५औं मिनेटमा नै आर्मीले अग्रता बनायो। विमला विकको लामो पासमा विमला चौधरीले किपर अगाडि बढेको बेला उत्कृष्ट प्लेसिङ गर्दै गोल गरिन्।

बागमतीका गोलकिपर र डिफेन्डरले आर्मीको केहि आक्रमणलाई विफल पारे। बागमती अट्याकमा भने कमजोर देखियो। ७० औं मिनेटमा सपना लामाको कर्नरमा विमलाको हेडरले सही दिशा लियो।

बागमतीकी कप्तान दिव्या स्माइली मगर ७९ औं मिनेटमा घाइते भइन्। उनलाई तत्काल अस्पताल लगियो। यसले बागमतीलाई आगामी खेलमा भने असर गर्न सक्छ। आर्मी दुई महत्वपूर्ण खेलाडी दीपा शाही र अमिशा कार्की बिना मैदानमा उत्रेको थियो।

आर्मीले लिगको पहिलो चरणमा बागमतीलाई ३-० ले हराएको थियो। दोस्रो चरणमा ५ टोलीबीच प्रतिस्पर्धा हुनेछ।

दोस्रो चरणमा कुल २४ खेल हुनेछन्। २० खेलपछि चार टिमले प्लेअफका स्थान बनाउनेछन्।‌ माघ १६ गतेसम्म चल्ने अन्तिम चरणको लिगमा विभागिय टोलीहरु नेपाल पुलिस क्लब, नेपाल एपिएफ क्लब, आर्मी , वालिङ नगरपालिका र बागमती सहभागिता रहनेछ। बागमतीले कोशी प्रदेशको स्थानमा खेलेको हो।
लिगमा शुक्रवार पुलिस र वालिङबिच खेल हुनेछ।