धरान (हाम्रो खेलकुद) – धरानमा जारी बुढासुब्बा रेडबुल गोल्डकप फुटबल प्रतियोगिताको तेस्रो क्वाटरफाइनलमा सिएमजी क्लब संकटा नेपाल एपिएफलाई १-० ले हराउदै प्रतियोगिताको सेमिफाइनलमा पुगेको छ ।
राष्ट्रिय खेलकुदमा स्वर्ण पदक विजेता नेपाल एपिएफ क्लब राज पौडेलको ३९ औँ मिनेटको गोलले पछि परेको थियो । पुसमा राष्ट्रिय खेलकुदमा स्वर्ण पदक जितेयता कुनै पनि प्रतियोगिताको फाइनल पुग्न नसकेको एपिएफको खराब प्रदर्शन जारी रह्यो भने गत महिना रुस्लान सिमरा गोल्डकपको उपाधि जितेको संकटाले आफ्नो लय कायमै राख्यो । अन्तिम ४ मा आफ्नो स्थान पक्का बनाउन सफल संकटाले आउदो बुधबार सेमिफाइनलमा उदयपुर गोल्डकप च्याम्पियन रुपन्देही ११ को सामना गर्नेछ ।
प्रतियोगिताको विजेताले उपाधि सहित ५ लाख र दोस्रो हुने टोलीले २ लाख ५० हजार रुपैयाँ प्राप्त गर्नेछ । झन्डै ५५ लाख रुपैयाँ खर्च हुने अनुमान गरिएको प्रतियोगिताको सर्वोत्कृष्ट खेलाडीले यामाहा मोटरसाइकल र उच्च गोलकर्ताले २५ हजार रुपैयाँ पाउने क्लबले जनाएको छ । उत्कृष्ट गोलकिपर, उत्कृष्ट डिफेन्स, उत्कृष्ट स्ट्राइकर, उत्कृष्ट मिडफिल्डर र उत्कृष्ट प्रशिक्षक तथा हरेक खेलको म्यान अफ दी म्याचले ५ हजार रुपैयाँ पाउनेछन् ।
