काठमाडौं (हाम्रो खेलकुद)- लगातार तेस्रो जितसँगै एपिएफ फुटबल क्लब एन्फा महिला लिगको अन्तिम चरणको शीर्षस्थानमा उक्लिएको छ।

एपिएफले बिहीवार नेपाल पुलिस फुटबल क्लबलाई ६-० ले हरायो। एपिएफको जितमा अनिता बस्नेतले ह्याट्रिक गर्दा सरु लिम्बुले २ तथा रेनुका नगरकोटीले १ गोल गरिन्।

एन्फा कम्प्लेक्समा भएको खेलको पहिलो हाफमा एपिएफले पुलिस विरुद्ध पुर्णरूपमा दबाब बनायो। १० औं मिनेटमा सरुकि पावरफुल प्रहारलाई पुलिसकी गोल किपर उषा नाथल बचाइन्।

तर ११ औं मिनेटमा एपिएफले अग्रता बनायो। अनिताको‌ लामो क्रस किपर अगाडि बाउन्स भएर गोल भयो । गोल किपर उषाले त्यो बललाई जज नै गर्न सकिनन्।

३२ औं मिनेटमा सविता राना मगरको क्रसमा किपर उषाले फम्बल गरिन्। त्यसपछि प्राप्त कर्नरमा रश्मि कुमारी घिसिङको हेडरले सही दिशा लिन सकेन ।

३७ औं मिनेटमा एपिएफले अग्रता दोब्बर गर्यो। सरुको प्रहार समिक्षा घिमिरेलाई लागेर फर्कियो। रिबाउन्डमा बक्सभित्रबाट रेनुकाले गोल गरिन्। पहिलो हाफमा एपिएफले २-० को अग्रता बनायो।

खेलको ७६ औं मिनेटमा प्रिती राईले हानेको लेफ्ट फुटेट सटलाई उषाले बचाइन्। ७९ औं मिनेटमा सुरुले क्लोज रेन्जमा पाएको मौकालाई सदुपयोग गर्न सकिनन्। यसपछि दुई मिनेटभित्र सरु लिम्बुले २ गोल गरिन्।

८५ औं मिनेटमा सविताको सटिक पासमा सरयले गोल गरिन्। लगतै ८७ औं मिनेटमा अनिताको असिस्टमा सरुले उत्कृष्ट गोल गरिन। इन्ज्युरी समयमा अनिताले २ गोल गर्दै ह्याट्रिक पूरा गरिन्। सन् २०२१ पछि उनको यो पहिलो ह्याट्रिक हो। विभागीय टिम विरुद्ध भने यो उनको पहिलो ह्याट्रिक हो।

दोस्रो चरणको खेलमा एपिएफ र पुलिस गोलरहित बराबरीमा रोकिएका थिए। ९ अंक बनाएको एपिएफले २ अंकको अग्रता बनाएको छ। पुलिस र आर्मीसँग समान ७ अंक छ। एपिएफले पहिलो खेलमा बागमती युथ क्लबलाई ५-१ ले र दोस्रोमा वालिङ नगरपालिकालाई ९-० ले हराएको थियो।

पुलिसको यो पहिलो हार हो। यसअघि पुलिसले वालिङलाई ५-० ले र बागमतीलाई २-० ले हराउँदा आर्मीसँग गोलरहित बराबरी खेलेको थियो। लिगमा शुक्रवार वालिङ र बागमतीबीच खेल हुनेछ।