काठमाडौं (हाम्रो खेलकुद)- वालिङ नगरपालिकालाई ३-० ले हराउँदै बागमती युथ क्लबले एन्फा महिला लिगको अन्तिम चरणमा पहिलो जित निकालेको छ।

चौथो खेलमा पुगेर बागमतीले अंकको खाता खोलेको छ। एन्फा कम्प्लेक्समा आज भएको खेलमा बागमतीलाई जित दिलाउन अस्मिता खवास र विष्णु माया बलले गोल गरे।

बागमती र वालिङ दुवै अंकको खाता खोल्ने दाउमा थिए। यो खेल प्ले अफ पुग्ने संभावनालाई बलियो बनाउन दुवै टिमलाई जित निकाल्ने दबाब थियो।

वालिङले सुरुवात राम्रो गर्यो। गोल गर्ने केहि उत्कृष्ट मुभ पनि बनायो। तर पाएको मौकालाई सदुपयोग गर्न सकेन। पहिलो हाफ गोलरहित बराबरीमा सकियो।

दोस्रो हाफ बागमतीको लागि सुखद रहयो। ५२ औं मिनेटमा साहारा लिम्बुको असिस्टमा अनमार्क रहेकी अस्मिताले क्लोज रेन्जबाट सहजै गोल गरिन्।

७५ औं मिनेटमा बागमतीले अग्रता दोब्बर गर्यो। तीन खेलाडीको कम्बिनेसनमा बागमतीले उत्कृष्ट गोल गर्यो। अस्मिताको थ्रु पासमा अन्जली चन्दले उत्कृष्ट शैलीमा बललाई अगाडि बढाउँदै दिएको पासमा विष्णु मायाको हाफ भलि सुन्दर गोलमा परिणत भयो।

बागमती ३ अंकसहित तालिकाको चौथो स्थानमा छ। यसअघि बागमतीले नेपाल पुलिस क्लब र त्रिभुवन आर्मी क्लबसँग समान २-० को हार बेहोर्दा एपिएफ फुटबल क्लबसँग ५-१ ले पराजित भएको थियो।

वालिङको यो लगातार चौंथो हार हो। यसअघि वालिङले आर्मीसँग एक दर्जन गोल खाँदा एपिएसँग ९-० ले खेल हारेको थियो।

पुलिससँग भने ५-० ले पराजित भएको थियो। ४ खेलमा अंकको खाता खोल्न नसकेको वालिङले २८ गोल बेहोरिसकेको छ। यो क्रममा एक गोल समेत गर्न सकेको छैन।

अन्तिम चरणमा सहभागी ५ टोलीको सहभागिता रहँदा ४ टोलीले प्ले अफमा स्थान बनाउनेछन्। जारी लिगमा लगातार ३ जित सहित एपिएफ शीर्षस्थानमा रहँदा दोस्रो स्थानको आर्मी र तेस्रो पुलिसको समान ७ अंक छ। भोलि लिडर एपिएफले आर्मीसँग खेल्नेछ।