धरान (हाम्रो खेलकुद)– नेपाल पुलिस क्लब १९ औं बुढासुब्बा रेडबुल गोल्ड कप फुटबल प्रतियोगिताको सेमिफाइनल प्रवेश गरेको छ । इन्जुरी समयमा मानबहादुर परियारले हेडमार्फत निर्णायक गोल गरेपछि भारतको कञ्चनजंगा एफसीलाई ३–२ ले हराउँदै पुलिसले अन्तिम चारको यात्रा तय गरेछ ।

प्रतिस्पर्धात्मक खेलका सबै गोल दोस्रो हाफमा सम्भव भएका थिए । दोस्रो हाफको १४ मिनेट भित्र २–० को अग्रतालाई पुलिसले जोगान नसक्दा जितका लागि अन्तिम सम्म संघर्ष गर्नु परेको थियो । २–२ को बराबरीको अवस्थामा इन्जुरी समयको पहिलो मिनेटमा मानबहादुरले हेड गोल गर्दै विभागिय टोलीलाई सेमिफाइनल पुर्याएका थिए ।

त्यसअघि पुलिसका लागि दुवै गोल अभिषेक रिजालले गरेका थिए । फ्रिकिकमार्फत ४९ औं मिनेटमा पहिलो गोल गरेका अभिषेकले त्यसको दश मिनेटपछि अर्को गोल गरेका थिए । तर खेलको अन्त्यतिर पुलिस सम्हालिन सकेन । कञ्चनजंगाले दस खेलाडीमा सिमित भएर पनि बराबरी गोल फर्काएको थियो । ६७ औं मिनेटमा कप्तान अमिर लामाले दोहोरो पहेलो कार्ड खादै मैदान बाहिरिनु परेपछि कञ्चनजंगा दस खेलाडीमा सिमित भएको थियो ।

युनाइटेड सिक्किम एफसीले प्राविधिक कारण देखाउँदै प्रतियोगितामा भाग नलिएपछि त्यसको सट्टा खेल्न धरान पुगेको कञ्चनजंगाले ७२ औं मिनेटमा गोल फर्काएको थियो । निवास रानाले फ्रिकिकमार्फत गोल गरेका हुन् । खेल सकिन दुई मिनेट बाँकी रहँदा लङगस तामाङले बराबरी गोल फर्काएका थिए । बराबरीको तीन मिनेटपछि मानबहादुरले निर्णायक गोल गरेका थिए ।

रुपन्देही ११, आयोजक धरान फुटबल क्लब निलो र सिएमजी क्लब संकटा यसअघि नै सेमिफाइनल पुगिसकेको छन् ।