मेलबर्न (हाम्रो खेलकुद) – अस्ट्रेलियाको मेलबर्नमा रहेको यती फुटबल क्लबले वार्षिक रूपमा आयोजना गर्दै आइरहेको फुटबल प्रतियोगिता ‘कँडेल कप २०२५’ फागुन अन्तिम साता हुने भएकाे छ ।

आयोजक यती फुटबल क्लबले प्रेस विज्ञप्ति जारी गर्दै १४औं संस्करणको ‘कँडेल कप २०२५’ आगामी मार्च ८ र ९ तारिखमा मेलबर्नको डार्बिन अन्तर्राष्ट्रिय स्पोट्र्स सेन्टरमा हुने जानकारी गराएकाे छ ।

यो संस्करणमा कुल ४० टोली सहभागी हुनेछन् । खुला प्रतिस्पर्धातर्फ २४ टोलीले प्रतिस्पर्धा गर्नेछन् भने ३५ वर्षमाथिको उमेर समूहमा १६ टोलीले प्रतिस्पर्धा गर्नेछन् ।

अस्ट्रेलियामा नेपाली समुदायद्वारा आयोजित सबैभन्दा ठूलो र सफल प्रतियोगिताहरू मध्ये एक कँडेल कपको मुख्य प्रायोजकमा कँडेल कन्सल्टेन्सीले निरन्तरता दिएको छ । प्रायोजकमा सफायर रियल स्टेट रहेको छ । प्रतियोगिताको संयोजकमा क्लबका उपाध्यक्ष सज्जन शर्मा रहेका छन् ।

नेपाल र नेपाली फुटबललाई प्रवद्र्धन गर्दै खेलकुदको माध्यमबाट समुदायलाई एकजुट बनाउने उद्देश्यले आयोजना गरिने यस प्रतियोगितामा क्यानबेरा, सिड्नी, गोल्डकोस्ट, ब्रिसबेन, तासमानिया र एडिलेडका क्लबहरू मेलबर्न आउने तयारीमा छन् ।

प्रतियोगिताको विजेताले १२ हजार अस्ट्रेलियन डलरसँगै कप मेडल र प्रमाण पत्र प्राप्त गर्नेछन् । दोस्रो हुने टोलीले ४ हजार ५ सय अस्ट्रेलियन डलरसँगै कप मेडल र प्रमाण पत्र प्राप्त गर्नेछन् ।

३५ वर्षमाथिको विजेताले २ हजार ५ सय अस्ट्रेलियन डलरसँगै कप मेडल र प्रमाण पत्र प्राप्त तथा उपविजेताले १ हजार डलरसँगै कप मेडल र प्रमाण पत्र प्राप्त गर्ने आयोजकले जनाएको छ । सर्वोत्कृष्ट खेलाडी, सर्वाधिक गोलकर्ता र फेयर प्ले अवार्ड जित्ने टोलीलाई समान २ सय डलर प्रदान गरिने आयोजकले जनाएको छ ।

यस्तै क्लबले यसै संस्करणबाट खेलाडी र खेलकर्मीसँगै रेफ्रीलाई समेत नेपाल–अष्ट्रेलिया फुटबलसँग अभ्यस्त बनाउने प्रयास गरेको जनाएको छ । महिला र बालबालिका लक्षित विशेष फुटबल कार्यक्रमहरू पनि प्रतियोगिताको मुख्य आकर्षणको रुपमा रहने क्लबका अध्यक्ष कर्ण रानाले जारी गरेको विज्ञप्तिमा उल्लेख छ ।

गत वर्ष सिड्नीको सेन्ट जर्ज नेप्लिज क्लबले उपाधि जितेको थियो ।