एजेन्सी – इंग्लिस प्रिमियर लिग टोली लिभरपुल युरोपियन च्याम्पियन्स लिगमा अपराजित रहँदै अन्तिम १६ मा पुगेको छ ।

लिभरपुलले मंगलवार फ्रेन्च टोली लिललाई २-१ ले हरायो । घरेलु मैदान एनफिल्डमा भएको खेलमा लिभरपुललाई जिताउन मोहम्मद सलाह र हार्भे एलिओटले समान एक गोल गरे । लिलका जोनाथन डेविडले एक गोल फर्काएका हुन् ।

लिभरपुलले खेलको ३४औं मिनेटमा सलाहको गोलमा अग्रता लिएको थियो । पाहुना टोलीका ऐसा मन्दीले ५९औं मिनेटमा रातो कार्ड प्राप्त गर्दै मैदान बाहिरिएका थिए । त्यसपछि १० खेलाडीमा सिमित लिलका लागि ६२औं मिनेटमा डेविडले बराबरी गो फर्काएका थिए ।

खेलको ६७औं मिनेटमा एलिओटले गोल गर्दै लिभरपुलको अपराजित यात्रा जारी राखे ।

बार्सिलोनाको रोमान्चक जित

दोस्रो हाफमा उत्कृष्ट पुनरागमनका‌ साथ  बार्सिलोनाले मंगलवार च्याम्पियन्स लिगमा बेन्फिकालाई ५-४ ले पराजित गरेको छ । राफिन्हाले इन्ज्युरी समयको छैटौं मिनेटमा बार्सिलोनाका लागि निर्णायक गोल गरेका थिए।
बेनेफिकाका भानगिलिस पाभ्लिडिसले पहिलो हाफमा ह्याट्रिक पूरा गर्दै बेन्फिकालाई ३-१ को अग्रता दिलाए पनि त्यसलाई जोगाउन सकेन।
बार्सिलोनाका लागि रोबर्टो लेवान्डोस्की र राफिन्हा समान २ तथा इरिक गार्सियाले १ गोल गरे ।
पाभ्लिडिसले ३० मिनेटमा ह्याट्रिक पूरा गरेका थिए । उनले दोस्रो मिनेटमा पहिलो गोल गरे । बार्सिलोनाका लेवान्डोस्कीले १३ औं मिनेटमा पेनाल्टीमा बराबरी गोल गरे।  २२ औं मिनेटमा दोस्रो र ३० औं मिनेटमा पेनाल्टीमा गोल गर्दै पाभ्लिडिसले ह्याट्रिक पूरा गरेपछि बेन्फिकाले पहिलो हाफमा नै ३-१ को अग्रता बनायो। ६४ औं मिनेटमा राफिन्हाले गोल गरे । ६८ औं मिनेटमा बार्सिलोनाको आत्मघाती गोलमा बेन्फिकाले अग्रता बढायो । ७८ औं मिनेटमा लेवान्डोस्कीले पेनाल्टीलाई अर्को गोल गरे। गार्सियाले ८४ औं मिनेटमा बराबरी गोल गर्दैै बार्सिलोनालाई‌ खेलमा फर्काए। इन्ज्युरी समयमा राफिन्हाको गोलमा बार्सिलोनाले सनसनीपूर्ण जित हासिल गर्यो । यो जितसँगै लिभरपुल र बार्सिलोना च्याम्पियन्स लिगको अन्तिम १६ मा पुगेको छ।
च्याम्पियनसिपमा बार्सिलोना दोस्रो स्थानमा छ। शीर्ष स्थानमा लिभरपुल छ।