काठमाडौं (हाम्रो खेलकुद) – गोरखा जिल्लाको परिचित गोर्खाली रनिङ कपको नवौं संस्करण फागुन ७ गतेबाट हुने भएको छ ।

गोरखा जिल्लाकै सर्वाधिक धनराशी पुरस्कार भएको यस प्रतियोगिताको विजेताले ४ लाख रुपैयाँ प्राप्त गर्ने आयोजक हरमटारी क्लबले जनाएको छ । उपविजेताले २ लाख पुरस्कार पाउने बुधबार पत्रकार सम्मेलन गर्दे क्लबले प्रतियोगिताबारे जानकारी दिएको हो ।

जिल्लामै खेलाडी उत्पादन गर्न, खेलको मध्यमबाट गोरखालाई चिनाउन तथा खेलाडीहरुलाई विस्थापित हुन नदिन प्रतियोगिता आयोजना गर्न लागिएको क्लबले जनाएको छ ।

‘जिल्लामा एन्फा, जिल्ला खेलकुद विकास समितिहरु छन्, उनीहरुले प्रतियोगिता आयोजना गर्दैनन्,’ क्लबका महासचिव किरण ढकालले भने, ‘जबसम्म हरमटारी क्लब रहन्छ, हामी रहन्छौं, प्रतियोगिता आयोजना गरिरहन्छौ ।’

फागुन ७ गतेदेखि १४ गतेसम्म हुने प्रतियोगितामा राष्ट्रिय स्तरका विभिन्न क्लवका साथै गोरखाका स्थानीय क्लबहरु गरी कुल १६ टिमले प्रतिस्पर्धा गर्ने छन् ।

खेलकुद मैदान हरमटारीमा हुने उक्त प्रतियोगिता संचालनका लागि २७ लाख ६० हजार रुपैयाँ खर्च लाग्ने अनुमान आयोजकले गरेको छ ।

यस्तै प्रतियोगितामा अनुशासित टिमले ३५ हजार तथा अन्य विधा अन्तर्गत सर्वोत्कृष्ट खेलाडीले २५ हजार, उत्कृष्ट  गोलरक्षक र उच्च गोलकर्ताले जनही १५ हजार तथा उदयीमान खेलाडी ले नगद १० हजार नगद र हरेक खेलका प्लेयर अफ दी म्याचले नगद २५ सय रुपैयाँ प्राप्त गर्ने क्लबले जनाएको छ ।

प्रतियोगिता अवलोकन गर्न टिकट दर ५० रुपैयाँ तथा सेमिफाइनल तथा फाइनल खेलका लागि रु १०० रहेको छ ।