धरान (हाम्रो खेलकुद)– धरानमा जारी १९ औं बुढासुब्बा रेडबुल गोल्डकप फुटबल प्रतियोगितामा बुधबार सिएमजी क्लब संकटा र रुपन्देही ११ बीच पहिलो सेमिफाइनल खेल हुँदैछ । पछिल्लो दुई सातामा दुवै टोली संकटा र रुपन्देहीले नकआउट प्रतियोगिताको उपाधि जितेर धरान पुगेका थिए ।
संकटाले त्रिभुवन आर्मीलाई हराउँदै माघ २९ गते रुस्लान आठौं सिमरा गोल्डकपको उपाधि जितेको थियो । त्यसको ३ दिन पछि (फागुन ३) गते रुपन्देहीले रमपम चौथो उदयपुर गोल्डकप प्रतियोगिताको उपाधि उचालेको थियो । रुपन्देहीले मोफसलको अर्को टोली मोरङ फुटबल क्लबलाई हराएको थियो । संकटा उदयपुर गोल्डकपमा सेमिफाइनलमा रोकिएको थियो ।
जारी बुढा सुब्बामा संकटाले पहिलो खेलमा भारतको दुर्गापुर कोलकातालाई ३–२ ले हराएको थियो भने क्वार्टरफाइनलमा एपिएफलाई १–० ले निराश पारेको थियो । अर्को तिर सोझै क्वार्टरफाइनलमा प्रवेश पाएको रुपन्देहीलाई काँकरभिट्टा फुटबल टे«निङ सेन्टरलाई टाइब्रेकरमा हराएर अन्तिम चारको यात्रा सुरक्षित गरेको थियो । अर्को सेमिफाइनलमा आयोजक धरान फुटबल क्लब निलो र नेपाल पुलिस क्लबबीच बिहीबार प्रतिस्पर्धा हुनेछ ।
प्रतियोगिताको विजेताले उपाधि सहित ५ लाख र दोस्रो हुने टोलीले २ लाख ५० हजार रुपैयाँ प्राप्त गर्नेछ । प्रतियोगिताको सर्वोत्कृष्ट खेलाडीले यामाहा मोटरसाइकल र उच्च गोलकर्ताले २५ हजार रुपैयाँ पाउने छन् । उत्कृष्ट गोलकिपर, उत्कृष्ट डिफेन्स, उत्कृष्ट स्ट्राइकर, उत्कृष्ट मिडफिल्डर र उत्कृष्ट प्रशिक्षक प्रत्येकले ५ हजार रुपैयाँ पाउनेछन् ।
