पोखरा (हाम्रो खेलकुद) – आहा रारा पोखरा गोल्ड कप फुटबल प्रतियोगिताको तयारी अन्तिम चरणमा पुगेको छ।

सहारा क्लबले पोखराको आयोजनामा माघ २२ गतेदेखि फागुन ३ गते सम्म आहा राराको २४ औं‌ संस्करण पोखरा रंगशालामा हुनेछ।

विकासमा सहकार्य गरौं, पोखरालाई खेलकुदको सहरको रुपमा स्थापित गरौं भन्ने मुख्य उद्देश्यका आयोजना हुने प्रतियोगितामा अहिले सम्म २ विदेशीसहित ११ टोलीको सहभागिता निश्चित भएको आइतवार पत्रकार सम्मेलनमा सहाराका महासचिव रामजीप्रसाद अधिकारीकले जानकारी दिए।

प्रतियोगिताको संरक्षकका रुपमा पोखरा उपमहानगरपालिका रहेको छ । प्रतियोगिताको मुख्य प्रायोजकमा हिम श्री फुड्स प्रा लिको उत्पादन रारा तयारी चाउचाउ रहेको छ ।

सहभागी हुने ए डिभिजनका टोलीमा विजेता त्रिभुवन आर्मी फुटबल क्लब, थ्री स्टार क्लब, मछिन्द्र, एनआरटी, चर्च ब्वाइज, संकटा क्लब, र नेपाल पुलिस क्लब छन् । आयोजना सहारा, एपिएफ, बिग्रेड ब्वाइज युके र भारत सिक्किमको थन्डरबोल्ट नर्थ युनाइटेडले‌ पनि प्रतिस्पर्धा गर्नेछन्।

प्रतियोगिताको च्याम्पियन टोलीले १२ लाख १ हजार र दोस्रो हुने टोलीले ६ लाख १ हजार रुपैयाँ प्राप्त गर्नेछ । प्रतियोगितामा १ करोड ४२ लाख २० हजार रुपैयाँ खर्च हुने अनुमान छ । प्रतियोगिता संचालनबाट बचत रकम क्लबबाट संचालित सूर्यबहादुर केसी एकेडेमीमा रहेका अनाथ बाल बालिकाको लागि खर्च गरिनेछ ।

प्रतियोगिताको प्रत्यक्ष प्रसारण हाम्रो खेलकुदको युट्युब च्यानलबाट हुनेछ ।