काठमाडौं (हाम्रो खेलकुद) – कप्तान अन्जन विष्टको उत्कृष्ट प्रदर्शनमा न्यू रोड टिम (एनआरटी) ले सभापति कप २०८१ को सेमिफाइनलमा स्थान पक्का गरेको छ ।

दशरथ रंगशालामा आइतबार सम्पन्न चौथो क्वाटरफाइनलमा एनआरटीले फ्रेन्ड्स क्लबलाई ३-१ ले पराजित गरेको हो । एनआरटीलाई अन्तिम चारमा पुर्याउन अन्जनले २ तथा रिचार्ड विल्सनले १ गोल गरे । फ्रेन्ड्सका लागि विवेक पौडेलले सान्तवना गोल फर्काए ।

पहिलो हाफमा कप्तान अन्जनले २ गोल गरेपछि एनआरटी बलियो स्थितिमा पुगेको थियो । अन्जनले खेलको २३ औं मिनेटमा सुरुवाती अग्रता दिलाएका थिए । एन्जल महर्जनको पासलाई अन्जनले पेनाल्टी क्षेत्र भित्रबाट फिनिस गरेका थिए ।

त्यसको ५ मिनेटमै अन्जनले व्यक्तिगत दोस्रो गोल गरे । कृतिश रत्न छुन्जुको क्रसलाई अन्जनले फार पोस्टमा हेडरमार्फत गोल गरेका थिए ।

दोस्रो हाफको सुरुवातमै रिचार्ड विल्सनले एनआरटीलाई ३-० ले अघि बढाए । उनले पेनाल्टी क्षेत्रको ठिक भित्रबाट फार पोस्टमा सुन्दर फिनिस गरेका थिए ।

६५ औं मिनेटमा रिचार्डको क्रसमा हेनरी पोकुको हेडर फ्रेन्डसका गोलरक्षक अभिषेक बरालले उत्कृष्ट बचाउ गरे । लगत्तै अभिषेकले एन्जल र रिचार्डको लगातार प्रहारलाई विफल पारे ।

८१ औं मिनेटमा फ्रेन्ड्सका कप्तान विवेक पौडेलले गोल गर्दै खेलमा फर्कने संकेत देखाए । उनले पेनाल्टी क्षेत्रभित्र दुई डिफेन्डरलाई छलाएर बायाँ खुट्टाले फिनिस गरे ।

प्रतियोगिता अन्तर्गत सोमबार पहिलो सेमिफाइनलमा संकटा क्लब र मच्छिन्द्र फुटबल क्लबले साँझ ५:३० बजे खेल्नेछन् । दोस्रो सेमिफाइनल मंगलबार आयोजकको बागमती लोकतान्त्रिक र एनआरटीबिच हुनेछ । फाइनल विहीबार हुनेछ ।