काठमाडौं (हाम्रो खेलकुद)- एन्फा महिला लिगको उपाधिको प्रमुख दाबेदार नेपाल एपिएफ क्लबको सामना आज नेपाल पुलिस क्लबले गर्दैछ।

जारी लिगमा एपिएफ एकमात्र अपराजित टोली हो। एपिएफ रवाफिलो प्रदर्शनले यस पटक पनि उपाधिको मुख्य दाबेदारको रुपमा रहेको छ।

लिगको पहिलो चरणका ९ खेलमा ८ मा जित र १ बराबरी गर्दै २५ अंकका साथ शीर्षस्थानमा रहँदै एपिएफ अन्तिम चरणमा पुगेको थियो।

पुलिसले पहिलो चरणमा ६ जित र ३ बराबरी नतिजाका साथ २१ अंक जोडेको थियो। पुलिस तेस्रो स्थानमा रहँदै अन्तिम चरण पुगेको थियो।

अन्तिम चरण डबल राउन्ड रोबिन फरम्याटमा भयो। जहाँ एपिएएले सबै ८ खेल जित्यो। शीर्षस्थानमा रहँदै पहिलो क्वालिफायरको हकदार एपिएफ बन्यो।

पुलिसले ८ खेलमा मात्र ३ खेल जित्यो। २ मा बराबरीको नतिजा निकाल्दा ३ खेलमा हारको सामना गर्यो। ११ अंक सहित तेस्रो स्थानमा रहँदै प्ले अफमा पुग्यो।

एपिएफले आर्मीलाई पहिलो क्वालिफायरमा २-१ ले हराएर फाइनलमा स्थान बनायो। पुलिसले इलिमिनेटरमा बागमती युथ क्लबलाई १-० ले हराउँदै दोस्रो क्वालिफायरमा खेल्यो। जहाँ आर्मीलाई टाइ-ब्ररकरमा हराउँदै फाइनलको यात्रा तय गरेको हो।

यो लिगमा एपिएफले कुल १८ खेल खेलेको छ। जहाँ उसले ९८ गोल गर्दा ६ गोल मात्र खाएको छ। एक खेलमा पनि हार बोहर्न परेको छैन। पुलिसले १९ खेल खेलेको छ। जहाँ ३४ गोल गर्दा १२ गोल बेहोरेको छ।

यसरी सरसर्ती तथ्याङ्कलाई हेर्ने हो भने एपिएफलाई बलियो आँक्न सकिन्छ। तर पुलिसले आर्मीलाई हराएको जस्तै प्रदर्शन गर्न सके एपिएफलाई हराउने संभावना पनि उतिकै रहेको छ।

यो लिगमा यसअघि तीन पटक एपिएफ र पुलिस भिडिसकेका छन्। एपिएफ अहिलेसम्म एक खेलमा बराबरीमा रोकिएको छ। बाँकी सबै खेल जित्न सफल टोलीम हो। एपिएफलाई बराबरीमा रोक्ने टोली पुलिस नै हो। पहिलो चरणमा एपिएफलाई पुलिसले गोल रहित बराबरीमा रोकिएको थियो।

दोस्रो चरणको दुई खेलमा नै एपिएफले पुलिसलाई हराएको थियो। पहिलो लेगमा ६-० र दोस्रो लेगमा २-० ले एपिएफ जित दर्ज गर्न सफल भएको थियो।

यही प्रदर्शनलाई निरन्तरता दिंदै एपिएफ उपाधि जित्ने दाउमा रहनेछ। एपिएफ सबै पक्षमा चुस्त देखिएको छ। पुलिसलाई भने दुई खेलको हारको बदला लिंदै उपाधि जित्ने सुनौलो अवसर रहेको छ।

फाइनल खेल दशरथ रङ्गशालामा आज दिउँसो २ बजे सुरु हुनेछ। फाइनल खेल हाम्रो खेलकुद डटकमले प्रत्यक्ष प्रसारण गर्नेछ।