पोखरा (हाम्रो खेलकुद)- आहा! रारा पोखरा गोल्डकप फुटबल प्रतियोगिताको २४ औं संस्करणआज पोखरा रंगशालामा सुरु हुँदैछ।

आयोजक सहारा क्लबले उद्घाटन खेलमा आहाको सर्वाधिक सफल टोली मध्येको एक नेपाल पुलिस क्लबको सामना गर्नेछ ।

पुलिस र मनाङ मस्र्याङ्दी क्लबले अहिले सम्म समान ६ पटक जितेको आहा गोल्डकपमा‌ थ्री स्टार क्लबले ५ पटक र संकटा क्लबले दुई पटक जितेको छ ।

आयोजक सहारा, अफ्रिकन युनाइटेड, एपिएफ फुटबल क्लब र त्रिभुवन आर्मी फुटबलले‌ समान १ पटक च्याम्पियन बनेका छन् ।‌ पूर्व विजेता मनाङ र अफ्रिकन‌ युनाइटेड बाहेक बाँकी सबै विजेतासहित १२ टोलीले यस पटक प्रतिस्पर्धा गर्दैछन् ।

पुलिसले कीर्तिमान सातौं पटक र आयोजक दोस्रो पटक च्याम्पियन बन्ने अभियानलाई सफल बनाउनका लागि जितबाट सुरुवात गर्नपर्नेछ।

२०५८ मा पहिलोपल्ट क्याराभान कपको नामबाट प्रतियोगिता सुरु हुँदा पुलिसले नै उपाधि जितेको थियो । २०५९ बाट हिमश्री फुड्सले प्रतियोगिता प्रायोजन गर्न थालेपछि आहा गोल्डकप, २०६९ बाट आहा–रारा गोल्डकप र २०७९ बाट आहा–रारा पोखरा गोल्डकपको नामबाट सन्चालन हुँदैछ ।

पुलिसले ०५८, ०५९, ०६४, ०६५, ०६६ र ०७४ मा उपाधि जितिसकेको हो । आहा रारा गोल्डकपमा पुलिस र सहाराबिच ३ पटक भेट भएको छ । ३ पटक नै सहारा पराजित छ ।

पुलिसमा अधिकाशं जस्तो नयाँ खेलाडी छन् । सहाराले ३ विदेशी खेलाडी राख्दै टोली‌ बनाएको छ।

पोखरा महानगरपालिकालकस मेयर धनराज आचार्यले प्रतियोगिताको उद्घाटन गर्नेछन्। विजेताले १२ लाख १ हजार र दोस्रो टोलीले ६ लाख १ रुपैयाँ प्राप्त गर्नेछन्। प्रतियोगिताको हाम्रो खेलकुदको‌ युट्युब च्यानलबाट प्रत्यक्ष प्रसारण हुनेछ।