दिपक न्यौपाने
बुटबल – लगातार हारको श्रृखंलालाई रोक्दै नेपाल एपिएफ क्लब १९ औं तिलोत्तमा गोल्डकप नकआउट फुटबल प्रतियोगिताको क्वार्टरफाइनलमा पुगेको छ । एन्फा टेक्निकल सेन्टर देविनगरमा बिहीबारको उद्घाटन खेलमा भारतको सेरे एफसी कालिङपोङलाई १–० ले हराउँदै सातौं राष्ट्रिय खेलकुदको स्वर्ण पदक विजेता एपिएफ अन्तिम आठमा पुगेको हो ।
पुसमा सातौं राष्ट्रिय खेलकुदमा स्वर्ण पदक जितेयता एपिएफले विभिन्न आठ नकआउट फुटबल प्रतियोगिताका पहिलो खेलमा हार बेहोर्दै आएको थियो । सरोज कोइरालाले २१ औं मिनेटमा गरेको गोल नै एपिएफको हारको श्रृखंला रोक्न पर्याप्त रह्यो ।
६९ औं मिनेटमा एपिएफले गोलअन्तरलाई दोब्बर पार्ने अवसर पाएको थियो । तर, सफल हुन सकेन । सेरे एफसीका गोलकिपर विवेक तामाङले राम कुमाललाई फाउल गरेपछि एपिएफले पेनाल्टी पाएको थियो । कप्तान मिलन राईको पेनाल्टीलाई विपक्षी गोलकिपरले रोक्दै एपिएफको गोलअन्तरलाई बढ्न दिएनन् । एपिएफका रुपक लामा खेलको म्यान अफ दी म्याच चुनिए । एपिएफले क्वार्टरफाइनलमा आयोजक अग्नी रुपन्देही ११ को सामना गर्नेछ ।
रुपन्देही जिल्ला फुटबल संघको आयोजनामा फागुन २१ गते सम्म चल्ने प्रतियोगितामा अग्नि रुपन्देही ११, रमपम झापा ११, हिमालयन शेर्पा क्लब, नेपाल आर्मी, भारतको सिक्किम युनाइटेड, धरान एफसी, नेपाल पुलिस क्लब र सिएमजी क्लब संकटाको सहभागिता रहेको छ ।
मोसफलकै प्रतिष्ठित गोल्डकप मध्येको एक तिलोत्तमा २०३३ सालबाट सुरु भएपनि पटक पटक आर्थिक अभाव र अन्य कारणले रोकिने गथ्थ्यो । गत बर्ष भने प्रतियोगिताले पुनः निरन्तरता पाएको छ ।
यसपटक प्रतियोगितालाई अग्नी सिमेन्टले मुख्य प्रायोजन गरेको छ । बुटवल उप महानगरपालिकाको संरक्षणमा संचालन हुने प्रतियोगितालाई करेन्ट मसला र हुवाइ मोबाइल सहयोग प्रायोजन गरेका छन् ।
त्यस्तै अखिल नेपाल फुटबल सघं (एन्फा), राष्ट्रिय खेलकुद परिषद (राखेप) र रुपन्देही जिल्ला विकास समिति प्रतियोगिताको विशेष सहयोगीका रुपमा रहेका छन् । तिलोत्तमा गोल्डकपको विजेता टोलीले उपाधिसहित ५ लाख ५५ हजार ५ सय ५५ रुपैयाँ प्राप्त गर्नेछ ।
तिलोत्तमा गोल्डकपमा शुक्रबारको खेल
त्रिभुवन आर्मीविरुद्ध सिक्किम युनाइटेड, भारत
