बुटबल (हाम्रो खेलुकद) – सहारा क्लबलाई १२ औं आहा रारा गोल्डकपको उपाधि दिलाएका प्रशिक्षक किरण श्रेष्ठको नेतृत्वमा ए डिभिजन क्लब हिमालयन शेर्पाले १९ औं तिलोत्तमा गोल्डकप नकआउट फुटबल प्रतियोगिता खेल्दैछ । हिमालयनले शनिबार पहिलो क्वार्टरफाइनलमा मोफसलको बलियो टोली रमपम झापा ११ को सामना गर्नेछ । देविनगरस्थित एन्फा टेक्निकल सेन्टरमा हुने प्रतिस्पर्धा रोमाञ्चक हुने अपेक्षा गरिएको छ ।

यसपटक पनि गत महिला आयोजक सहारालाई १५ औं आहा रारा गोल्डकपको फाइनल सम्म पुर्याएका किरणले हिमालयनलाई प्रशिक्षण दिन थालेको झन्डै दुई साता हुँदैछ । ‘उदयपुर गोल्डकपमा एउटा खेल हेर्न गएको थियो’ प्रशिक्षण श्रेष्ठले भने, ‘त्यसपछि प्रशिक्षण दिन थालेको छु । हिमालयन शेर्पा पनि राम्रो क्लबमा पर्दछ, यो मेरो लागि पनि मौका हो । उत्साहित पनि छु ।’
प्रशिक्षण जीवनमा लामो समय सहारामा आबद्ध रहेका श्रेष्ठको हिमालयन क्लब चौथो क्लब हो । सहारा बाहेक उनले बौद्ध फुटबल क्लबको नेतृत्व दुई सिजन सम्हाले भने गत बर्ष राष्ट्रिय लिगमा उनले सुदूरपश्चिमाञ्चललाई प्रशिक्षण दिएका थिए ।
ए डिभिजन लिग भएमा भने हिमालयनसँग केही बर्ष काम गर्ने सम्भावना रहेको श्रेष्ठले प्रष्ट पारे । ‘अहिले त मौखिक मात्रै सहमतिमा टोली हेरेको छु’ उनले थपे, ‘मुख्यतः लिग हुने भयो भने लामो समय हेरिन्छ । घरेलु फुटबल कसरी अघि बढ्छ , त्यसमै भर प्रर्दछ ।’

अखिल नेपाल फुटबल संघ (एन्फा) को आन्तरिक विवादपछि कारवाहीमा परेका कारण हिमालयन शेर्पा झन्डै दुई बर्ष घरेलु फुटबलबाट बाहिर रह्यो । कात्तिकमा एन्फा निर्वाचनयता प्रतिबन्ध फुकुवा भएपछि दुई महिनाअघि काँकरभिट्टा गोल्डकप खेल्दै हिमालयनले घरेलु फुटबलमा पुनरामगन गरेको थियो । त्यसयता लगातार नकआउट खेल्दै आएपनि हिमालयनको प्रदर्शन सन्तोषजनक हुन सकेको छैन ।
राम्रो नतिजाका लागि सक्दो प्रयास गर्ने प्रशिक्षण श्रेष्ठले बताए । ‘नयाँ खेलाडी पनि झन् , हामी भविष्यलाई हेरेर टिम सेट पनि गर्दैछौं ’ उनले भन्े,‘झापा राम्रो टिम हो । त्यसैले खेल पक्कै सहज हुने छैन । ’ काँकरभिट्टा गोल्डकप जितेयता नियमित नकआउट खेल्दै आएको झापाले आफ्नै आयोजनामा भएको झापा गोल्डकपको फाइनल खेलेको थियो । जहाँ टोली लक्ष्मी हुन्डाई मनाङ मस्र्याङ्दीसँग पराजित भएको थियो ।
रुपन्देही जिल्ला फुटबल संघको आयोजनामा सञ्चालित मोफसलकै प्रतिष्ठित गोल्डकप मध्येको एक तिलोत्तमा २०३३ सालबाट सुरु भएपनि पटक पटक आर्थिक अभाव र अन्य कारणले रोकिने गथ्थ्यो । गत बर्ष भने प्रतियोगिताले पुनः निरन्तरता पाएको छ ।
यसपटक प्रतियोगितालाई अग्नी सिमेन्टले मुख्य प्रायोजन गरेको छ । बुटवल उप महानगरपालिकाको संरक्षणमा संचालन हुने प्रतियोगितालाई करेन्ट मसला र हुवाइ मोबाइल सहयोग प्रायोजन गरेका छन् । त्यस्तै एन्फा, राष्ट्रिय खेलकुद परिषद (राखेप) र रुपन्देही जिल्ला विकास समिति प्रतियोगिताको विशेष सहयोगीका रुपमा रहेका छन् । तिलोत्तमा गोल्डकपको विजेता टोलीले उपाधिसहित ५ लाख ५५ हजार ५ सय ५५ रुपैयाँ प्राप्त गर्नेछ । पहिलो दुई दिन विभागिय टोली एपिएफ र त्रिभुवन आर्मी क्लब विजयी हुँदै क्वार्टरफाइनल पुगेका थिए ।